Украина Патриот ракеталари эвазига Россия НҚЗга зарбаларни 30 кунга тўхтатишга тайёр
Украина президенти Володимир Зеленский АҚШ Патриот тизимлари учун тутиб қолувчи ракеталарни етказиб берса, Киев Россиянинг нефтни қайта ишлаш заводларига зарбаларни 30 кунга тўхтатишга тайёрлигини билдирди. У Вашингтонни иттифоқчилар томонидан пули тўланган ракеталар таъминотини кечиктиришда ҳам айблади.
Украина Патриот ракеталари эвазига Россиянинг НҚЗларига зарбаларни 30 кунга тўхтатишга тайёр
Зеленский бу ҳақда 19-октабр куни АҚШ сенаторлари Ричард Блументал ва Том Тиллис билан онлайн суҳбатда маълум қилган.
Украина президентининг айтишича, Пентагон ПУРЛ — Украинанинг устувор эҳтиёжлари рўйхати дастури доирасида ҳамкорлар маблағ ажратган ракеталарни етказиб беришни кечиктирмоқда. Жўнатишга тайёр пакетлардан бири АҚШ мудофаа вазири Пит Ҳегсетнинг имзосини кутмоқда.
Зеленский Европа давлатларидаги захиралардан Украинага Патриот учун ракеталар бериш масаласи ҳам Вашингтон рухсатига боғлиқ бўлиб қолаётганини таъкидлаган.
«Ҳамкорларимиз, жумладан, Европадагилар ҳам ўз захираларидан бизга Патриот учун тутиб қолувчи ракеталарни етказиб беришга АҚШ рухсат беришини кутмоқда. Буларнинг барчаси бизга кўмакни секинлаштириш бўйича қандайдир сиёсий қарор қабул қилинганини кўрсатмоқда», - деган у.
Украина президенти ҳарбий ёрдамдан ташқари, ахборот алмашинуви ва алоқа тизимлари билан боғлиқ муаммоларни ҳам тилга олган. Унинг сўзларига кўра, сўнгги вақтларда Киев Россиянинг баллистик ракета ҳужумлари ҳақида АҚШдан уч марта огоҳлантириш олмаган.
Шунингдек, Зеленский Старлинкънинг ҳарбий алоқа хизматлари пакети — Старшиелдъдан фойдаланишдаги чекловлар юзасидан ҳам тўлиқ тушунтириш берилмаганини айтган. У бу ҳолатларни «дўстлар ўртасидаги муносабатларда изоҳлаш қийин бўлган Америка томони қарорлари» деб баҳолаган.
Зеленскийнинг билдиришича, Киев Доналд Трамп талаб қилаётганидек Россия нефтни қайта ишлаш заводларига ҳужумларни 30 кунга тўхтатиши мумкин. Бироқ бунинг шарти — АҚШ Украинага Патриот ҳаво ҳужумидан мудофаа тизимлари учун тутиб қолувчи ракеталарни тақдим этиши.