Украина армиясига интернет етказган Старлинк стансиясига ўт қўйишда гумонланганлар ушланди
Германияда Полша ҳудудидаги Старлинк сунъий йўлдош интернети стансиясига ўт қўйишда гумонланаётган икки Туркия фуқароси ушланди. Берлинда эса уларга ёрдам берган бўлиши мумкин бўлган яна бир шахс қўлга олинди. Билд маълумотига кўра, мазкур стансия Украина Қуролли кучларини ҳам интернет билан таъминлаган.
Украина армиясига интернет узатган Старлинк стансиясига ўт қўйишда гумон қилинганлар қўлга олинди
ДВ хабарига кўра, Полша бош вазири Доналд Туск 12-октабр куни Х ижтимоий тармоғида икки гумонланувчининг Германияда ушланганини маълум қилган.
Туск Мазовия воеводалигида жойлашган Старлинк стансиясига ўт қўйилишини «гибрид урушнинг яна бир акти» деб атаган. Унинг айтишича, гумонланувчилар Полша суди олдида жавоб беради.
Полша ички ишлар вазири Марчин Кервинский эса уларга хорижий давлат топшириғига биноан қўпорувчилик содир этиш бўйича айблов қўйилишини билдирган.
Билд ва Счвäбисче Зеитунг нашрларининг ёзишича, икки Туркия фуқароси Германиянинг Баден-Вюртемберг федерал еридаги Нюртинген шаҳрида қўлга олинган. Бу шаҳар Штутгартдан тахминан 30 километр жануби-шарқда жойлашган.
Счвäбисче Зеитунг ушланганларнинг исмларини Муслим Т. ва Умит Е. деб келтирган.
Билд маълумотига кўра, 12-октабр куни Германия полициясининг махсус бўлинмаси Берлиннинг Штакен ҳудудида уларнинг эҳтимолий шеригини ҳам ушлаган. Унинг Мерседес автомобили криминалистик экспертизадан ўтказилган. Нашр ёзишича, мазкур шахс гумонланувчиларга ҳайдовчилик қилган бўлиши мумкин.
Варшава яқинидаги Старлинк ер усти стансияси 23-сентабр куни ўт қўйилиши оқибатида зарарланган. Ёнғин электр подстансияси ва генераторни қамраб олган.
Билд хабарига кўра, стансия қисқа муддат ишлашдан тўхтаган, кейин эса фаолиятини тиклаган. Ҳодисада ҳеч ким жароҳатланмаган.
Полша расмийлари ёнғиндан сўнг воқеани қўпорувчиликка уриниш деб баҳолаган.
Билд ҳужум ортида Россия турган бўлиши мумкинлиги ҳақида ёзган. Бироқ манбада қайд этилишича, Россиянинг ўт қўйишга алоқадорлигини тасдиқловчи бевосита далиллар ҳозирча йўқ.
Полша бош вазири ўринбосари Кшиштоф Гавковский 23-сентабр куни ҳодисанинг кўплаб белгилари Россиянинг ҳужумларни амалга ошириш бўйича янги доктринасига мос келишини айтган.