Туркия маданий меросни нега дронлар билан ҳимоя қилмоқда?
Туркия тарихий ёдгорликларни ноқонуний қазишмалардан асраш учун учувчисиз қурилмалардан фойдаланади
**Туркия маданий меросни нега дронлар ёрдамида ҳимоя қилмоқда?**
Туркиянинг Маниса вилоятидаги қадимий Сардис шаҳри ҳамда Бин Тепедаги Лидия қўрғонлари бундан буён дронлар орқали назорат қилинади. Шу мақсадда ҳаводан кузатув ва хавфсизлик маркази иш бошлади.
Марказнинг бош вазифаси — археологик ёдгорликларни ноқонуний қазишмалар, хазина изловчилар ва жисмоний зарар етказилишидан асраш. Дронлар катта ҳудудни, жумладан, тунги пайтда ҳам кузатиш имконини беради.
Ушбу ёндашувнинг муҳим томони шундаки, эътибор тарихий обидаларга зарар етказилгандан кейин чоралар кўришга эмас, балки ноқонуний ҳаракатларни эрта аниқлаш ва уларнинг олдини олишга қаратилган.
Марказ узоқ масофага уча оладиган ва тунги тасвирга олиш имконига эга иккита учувчисиз учиш аппарати билан жиҳозланган. Учта антенна тизими эса кузатув ҳудудини кенгайтиришга хизмат қилади.
Шунингдек, кузатув стансиялари, йирик экранлар ва хавфсизлик камералари ҳам марказ фаолиятига жалб этилган. Дронларни бошқараётган хавфсизлик ходимлари махсус тайёргарликдан ўтган ва зарур сертификатларга эга.
Ҳаводан кузатув вақтида шубҳали ҳолат ёки ноқонуний қазишмага уриниш аниқланса, маълумотлар тезкор чоралар кўрилиши учун жандарм бўлинмаларига узатилади. Шу тариқа, технология назоратни кучайтириш ва ҳуқуқбузарликларнинг олдини олиш воситасига айланмоқда.