Туризмдан энг катта иқтисодий наф кўраётган давлатлар маълум бўлди
2025-йилда саёҳат ва туризмнинг АҚШ иқтисодиётига қўшган ҳиссаси 2,63 триллион долларни ташкил этган. Бу кўрсаткич бўйича Хитой иккинчи, Германия эса учинчи ўринни эгаллаган. Рейтинг фақат хорижий сайёҳлар сарфлаган пулни эмас, ички саёҳатлар ва туризм билан боғлиқ бошқа иқтисодий фаолиятни ҳам қамраб олади.
Туризмдан энг катта иқтисодий фойда олаётган давлатлар аниқланди
.
Баҳолашда меҳмонхоналар, ресторанлар ва транспорт компаниялари фаолиятидан ташқари, уларга товар ва хизмат етказиб берувчилар ҳамда соҳа ходимларининг харажатлари орқали юзага келадиган иқтисодий таъсир ҳам инобатга олинган. Шу сабабли бу рўйхат энг кўп хорижий сайёҳ қабул қилган давлатлар рейтинги билан бир хил эмас.
Биринчи учлик қуйидагича:
АҚШ - 2,63 триллион доллар;
Хитой - 1,75 триллион доллар;
Германия - 566 миллиард доллар.
АҚШнинг кўрсаткичи Хитойникидан қарийб 50 фоиз юқори. Икки давлат орасидаги тафовут 880 миллиард долларга етган. Бу эса бошқа исталган алоҳида мамлакатда туризмнинг иқтисодиётга қўшган ҳиссасидан ҳам каттароқ.
Германия Европада етакчига айланишга муваффақ бўлиб, Франсия ва Испания каби машҳур сайёҳлик йўналишларини ортда қолдирган. Бунда мамлакат ички бозорининг катталиги муҳим рол ўйнаган.
2025-йилда Германияда қайд этилган тунаб қолишларнинг қарийб 83 фоизи мамлакат аҳолиси ҳиссасига тўғри келган. Хорижий меҳмонлар тунаб қолишлари камайганига қарамай, ички талаб ҳисобига жойлаштириш муассасаларида йиллик рекорд натижа қайд этилган.
Япония эса 2025-йилда рекорд даражада - 42,7 миллион хорижий сайёҳни қабул қилган. Бу 2024-йилдагидан 15,8 фоиз кўп. Сакура гуллаши ва қишки спорт турлари каби мавсумий йўналишлар билан бирга, Осакада ўтказилган Эхпо жаҳон кўргазмаси ҳам сафарларга қўшимча туртки берган.
Хитойнинг туризм иқтисодиёти 2025-йилда 9,9 фоизга ўсган. Бу ўртача жаҳон ўсиш суръатидан икки баравардан ҳам юқори. Хорижий сайёҳлар сони 15,5 фоизга ошиб, 68 миллиондан ошган, уларнинг харажатлари эса пандемиядан олдинги даражадан юқорилаган.
Мамлакатга кириш тартибларининг енгиллаштирилиши ҳам сайёҳларни жалб этишга ёрдам бермоқда. Хитой визасиз кириш мумкин бўлган давлатлар рўйхатини кенгайтириб, транзит йўловчилар учун рухсат этилган қолиш муддатларини узайтирган. Чегарадан ўтиш жараёнлари ва рақамли тўлов хизматларининг қулайлашиши ҳам саёҳатларни осонлаштирмоқда.