“Туғилганимни эшитиб, отам хафа бўлган”. Ойбекка турмушга чиқишни хоҳламаган, боғчада энагалик қилган, тўрт фарзанднинг онаси Нигора 38 ёшда

“Туғилганимни эшитиб, отам хафа бўлган”. Ойбекка турмушга чиқишни истамаган, боғчада энагалик қилган, тўрт фарзанднинг онаси Нигора 38 ёшда

Ўзбек шоу-бизнесида узоқ йиллар бирга ижод қилган дуетлар кўп эмас. Турли сабаблар, келишмовчиликлар ёки ижодий қарашлардаги фарқлар туфайли кўплаб дуетлар фаолиятини тўхтатган. Ойбек ва Нигора эса бу борада истисно. Улар 21 йилдан буён бир саҳнада, бир оилада ва тўрт нафар фарзанд тарбиясида ҳамнафас бўлиб келмоқда. Хонанда Нигора 12-сентябр куни 38 ёшни қаршилади, шу муносабат билан унинг ҳаёти ва ижодий фаолиятига назар ташлаймиз.

“Отам ўғил фарзанд кўришни истаган”

Нигора Исмоилова 1988-йил 12-сентябр куни Тошкент шаҳрида ищилар оиласида туғилган. У тўртинчи қиз фарзанд бўлиб, учта опаси ва бир укаси бор.

— Отам раҳматли автобус ҳайдовчиси бўлган. Онам эса болалар шифокори бўлиб ишлаган. Улар катта даромадли соҳада ишлашмаган бўлса ҳам, беш фарзандни бировдан кам қилмай катта қилишган. Оилада тўртинчи қиз фарзанд бўлганман. Отам раҳматли ҳар гал “Қиз туғилади”, деган хабарни эшитганида ранжиган экан. Ўғил фарзанд кўришни жудаям истаган экан. Ҳатто менинг ҳам қиз бола эканлигимни эшитиб “Касалхонадан олиб чиқишга бормайман, ўзинг келавергин”, деб гапирган экан. Аммо онам “Барибир кўнгли бўлмай, касалхонага келган, сизларни яхши кўрарди”, дерди. Аммо укам Зоҳиджон туғилган кунни опаларим жуда яхши эслашади. Қувонганларидан “Ўғилли бўлдим”, деб эмаклаб уйга кириб келган экан, дейди Нигора.

“Уч ёшимдан саҳнага интилганман”

Нигора Исмоилованинг оиласида санъаткорлар бўлмаса-да, у болалигидан қўшиқ айтишга қизиққан. Уч ёшидан саҳнага интилганини қуйидагича эслайди.

Мактабда жуда аълочи бўлмасам-да, байрам тадбирларида қатнашишга жуда қизиқар эдим. Ўша кезларда маҳалламизда Фотима ва Зуҳра Зиёмуҳамедовалар бощилигидаги ноанъанавий болалар қўшиқчилик танлови ўтказилди. Танловнинг ноанъанавийлиги шундаки, у ерда соғлом болалар билан бир қаторда, кўзи ожиз ва ногирон болалар ҳам ўзларининг истеъдодларини синаб кўришлари мумкин эди. Табиийки, мусиқага қизиқишим кучли бўлгани сабабли танловда иштирок этдим. Омадим келибми, танловда ғолиб бўлдим.

Сўнгра танлаб олинган болалар жамоасидан хор ташкил қилинди ва “Узбелл” деб ном берилди. Хор жамоада биз қўшиқчилик сирларини ўргандик. Бу ерда мен жуда кўплаб дўстлар орттирдим. Хонанда Зиёда билан ҳам айнан шу ерда танишганман. У бўш вақтларида “Тантана” гуруҳи ҳақида гапириб берар эди. Ўз-ўзидан менда шу гуруҳнинг аъзоси бўлиш истаги пайдо бўлди. Бир куни хор жамоамиз номаълум сабабларга кўра ёпилди. Жуда ҳафа бўлдим, лекин Фотима ва Зуҳра опалар мени “Тантана” гуруҳига таклиф қилишганида ўзимда йўқ хурсанд бўлиб кетдим, дейди хонанда.

“Боғчада ишлаганман”

Ойбек ва Нигора жуфтлигидаги Нигора мактабни тамомлагандан сўнг бир муддат боғчада энагалик қилган.

— Оиламиз камтарона ҳаёт кечирган. Отам раҳматли автобус ҳайдовчиси, онам эса болалар шифокори бўлган. Мактабни тамомлагач, бир муддат боғчада энагалик ҳам қилганман. Болалар билан тез тил топишганим учун қийналмаганман. Биринчи маошимни олганимда ота-онам роса хурсанд бўлишган. Ўзим ишлаб топган пулга ош масаллиқларини олиб, оила аъзоларимни хурсанд қилгандим, дейди хонанда Нигора.

“Акфа Медиага таниш-билишсиз қабул қилинганмиз”

Нигора “Тантана” болалар гуруҳи билан кўплаб консерт дастурларида қатнашади. Мактабни тамомлаб устозларининг тавсияси билан мусиқа коллежига ўқишга киради. Иккинчи курсда ўқиётганида эса устозлари унга продюсерлик компанияси ўтказаётган кастингда иштирок этишни таклиф қилишади.

Ўшанда Нигора иккимиз дарсдан чиқиб, “Акфа” компаниясини излаб борганмиз. Аввалига кастинг ҳақида ота-онамга айтмаганман. Чунки улар қарши бўлишларини аввалдан тахмин қилгандим. Аксига олиб кастинг топшириладиган кун томоғим бўғилиб қолган. Ўшанда Самандар Ҳамроқулов ва компания раҳбарлари ҳайъат аъзоси бўлганди. Нигора синовдан ўтган, аммо мени қабул қилишмаган, дея эслайди хонанда Зиёда.

Нигора эса таниш-билишсиз кастингдан ўтганини ва овози ундан кучли қизлар жуда кўп бўлганини эслайди.

— Овозимнинг имкониятлари жуда кам, буни яхши биламан. Баланд пардаларда куйлай оламан, деб мақтанолмайман. Кастингда иқтидорли қизлар кўп эди, аммо омад менга кулиб боққан. Ҳеч қандай таниш-билишсиз қабул қилинганман. Аммо менга Ойбек билан бирга куйлаш ёқмаган. Илк бора Ойбек билан куйлаган “Излайман” дует қўшиғи кўпчиликка манзур бўлди. Шундан сўнг раҳбариятимиз яна бир дует қўшиқ яратиш таклифини билдиришди ва “Сен учун” номли қўшиқ дунёга келди. Унга ҳам ўз навбатида клип суратга олиниб, халқимизга тақдим қилинди. Қисқа вақт ичида қўшиқ оммалашиб, ҳит-парадларнинг юқори поғонасига кўтарилди. Шундан сўнг мен ва Ойбекни Ойбек ва Нигора дует гуруҳи сифатида таний бошлашди, дейди хонанда Нигора.

“Ҳамкорлик чиройли якунланмади”

Ойбек ва Нигора жуфтлиги 2008-йили “Ниҳол” номидаги давлат мукофотини қўлга киритишди. Ҳит қўшиқларнинг ҳам кети узилмаётганди. Аммо 2010-йил продюсерлик компанияси ва унда ижод қилувчи хонандалар ўртасига совуқчилик тушди.

Чунки чиройли якун бўлмади, қанча пул топаётганимизни билардик. Яна қайтадан ҳаммасини изга солиш осон бўлгани йўқ. Ўша кунгача биз билан ҳамкорлик қилиб келган ижодкорлардан “Бўлди, буларнинг пули йўқ, улар билан ишлаш бефойда”, деган гапларни эшитдик. Янги қўшиқлар яратардик, аммо уларга клип олиб, оммага тақдим этишга имконимиз бўлмасди. Ўша пайтда гина-кудуратлар бўлган, ҳозир эса “Акфа Медиа”дан фақат миннатдормиз. Чунки улар сабаб Ойбек ва Нигора жуфтлиги пайдо бўлди ва брендимиз одамлар орасида танилди, дейди хонанда.

“Ойбекка турмушга чиқмайман”

Нигора оила қурмасдан аввал нима учун журналистларнинг “Оила қурасизларми?” деган саволига рад жавобини берганини қуйидагича изоҳлади.

— Ойбек бирор марта мени ёлғиз қолдирмаган. Ҳамиша бирга эдик, унинг эътибор беришини сезардим. Аммо бирор марта кўнглидагиларни очиқчасига айтмасди. Шу боис жаҳлим чиқиб, “Сизга турмушга чиқмайман, кўзимга кўринманг”, дердим. Энг қизиғи, бу гапларимга ҳам эътибор бермасди. Оиламиз ҳам аввалдан яқин муносабатда бўлган, дейди Нигора.

“Яхши келин бўлмаганман”

Хонанда Нигора очиқчасига яхши келин бўлмагани ва ўғиллари ўзидек келин билан оила қуришларини истамаслиги ҳақида айтган.

Ярим кечагача хизматда бўлардик, табиийки, кейин тушгача ухлардик. Аммо тўйдан кейин бир ҳафта келинлик вазифаларимни бажариб, соат тонгги бешда кўча-ҳовлиларни супурганман. Кўпчилик “Сизга ҳавасим келади, келиним сиздек бўлсин”, деса, гапингизни қайтариб олинг, деб куламан. Ҳатто ўғилларимга ҳам мендек келин келишини истамайман, дейман ҳазиллашиб, дейди Нигора.

“Эрим билан келишолмай, онамникига кетганман”

— Биринчи фарзандимдан кейин ҳамма оналар каби менда ҳам уйқусиз кечалар, оғриқлар ва эрга эътиборсизлик бўлган. Шу эътиборсизлик эр тарафидан тушунилмаса, тушунмовчиликлар келиб чиқади. Менда ҳам шу ҳолат бўлган. Ҳомиладорлик даврим ҳам, фарзандимни дунёга келтишим ҳам анча қийинчилик билан ўтган. Болам она сутини ҳам, бўтқаларни ҳам ичмасди. Оч қолиб кетяпти деб, ундан ҳавотирланардим. Қийналиб кетганимдан кечалари йиғлаб ўтирардим. Бутун баданим оғрир эди. Хуллас, туғруқдан кейинги депрессияга кириб кетганман. Эрга эътибор бериш умуман йўқ, хаёлим фақат боламда бўлиб қолганди. У ҳам фақат чақалоққа қарарди. Бирга бўлишга ҳаракат қилардиг-у, аммо ўртамизда нимадир тургандек бўлаверарди. Кейин бир-биримиздан дам олганмиз. Мен ота уйимга кетганман. Воз кечиб эмас, дам олиш, тикланиш учун. Қайноналарга ҳам келинини туғруқдан сўнг онасиникига юборишларини сўрайман. Ўзимнинг бошимдан шу кунлар ўтди. Ўзимга келганимдан сўнг, уйимга қайтиб бориб, турмуш ўртоғим билан орамиз исишни бошлаган, дея эслайди Нигора илк бор она бўлган йилларини.

Улар ижодда фаол бўлса-да, аввалгидек ҳит қўшиқлари камайган. Дуетдошлар чақалоқларни кутиб олиш маросимларида фаол иштирок этишади.