Трампнинг ўғли тўй базми пулини россиялик бизнесменга қайтарди - Кремлев
Кичик Доналд Трамп тўйи муносабати билан ташкил этилган базм харажатларини россиялик тадбиркор Умар Кремлевга қайтарган. Бу ҳақда Халқаро бокс ассоциацияси (ИБА) раҳбари Кремлев 6-октабр куни Истанбулдаги матбуот анжуманида маълум қилди.
Трампнинг ўғли тўй базми учун сарфланган пулни россиялик бизнесменга қайтарган — Кремлев
Кремлевнинг айтишича, у АҚШ президентининг ўғли билан бир тадбирда иштирок этган, бироқ тўй маросимининг ўзида бўлмаган. Тадбиркор харажатлар қопланганини тасдиқлаган, аммо пул қайтарилишини кутмаганини айтган.
«Харажатларни қайтардими ёки йўқми, деган саволга келсак - ҳа, қайтарди», - дея Кремлевнинг сўзларини ТАСС келтирган.
ИБА раҳбари буни алоҳида совға деб билмаганини, гап умумий тадбир ҳақида кетаётганини айтган. У вазиятни меҳмонларни дала ҳовлига таклиф қилиб, кейин уларга ҳисоб чиқаришга ўхшатган.
Кремлев Трамп-младший билан дўстона муносабатда эканини ҳам таъкидлаган. Унинг сўзларига кўра, у АҚШ президентининг ўғлидан ўзига ёрдам беришни сўрамаган.
Доналд Трамп ҳам 18-сентабр куни журналистлар билан суҳбатда ўғли Кремлевга пулни қайтарганини айтган эди. АҚШ президенти дўстлардан бири тўй муносабати билан ўтказилган байрам харажатларини тўлаши одатий ҳол эканини қайд этган.
Масала 14-сентабрда ПроПублиса нашри эълон қилган журналистик суриштирувдан сўнг жамоатчилик эътиборига тушган. Унда кичик Трампнинг Багама оролларидаги тўй тантаналари харажатларининг бир қисмини Кремлев тўлагани айтилган.
Шундан кейин Трамп Ахиос нашрига Умар Кремлевни танимаслигини билдирган. Унинг изоҳига кўра, россиялик бизнесмен тўйнинг ўзини эмас, келин-куёв шарафига кейинроқ уюштирилган базмни молиялаштирган. Президент тўй бошқа жойда ва бошқа куни бўлиб ўтганини, ўзи эса мазкур базмда қатнашмаганини таъкидлаган.
Воқеа АҚШ Конгрессидаги демократлар эътиборини ҳам тортган. Вакиллар палатаси Назорат қўмитаси аъзоси Роберт Гарсия Оқ уй аппарати раҳбари Сюзи Уайлзга хат юборган.
Ахиос маълумотига кўра, Гарсия қўмитадаги демократлар Трамп оиласи президентга яқинликдан молиявий фойда олиш учун фойдалангани ҳақидаги даъволарни ўрганаётганини билдирган. Базм харажатларини россиялик тадбиркор қоплагани ҳақидаги хабарлар ҳам шу доирада текширилиши мумкин.