Россиялик тадбиркордан юз минглаб долларлик «совға»: кичик Трамп атрофида можаро
Кичик Доналд Трампнинг Баҳама оролларидаги ҳашаматли тўй базми Вашингтонда сиёсий можарога айланди. Россия президенти Владимир Путин билан алоқалари бор деб таърифланаётган Умар Кремлёвнинг байрам харажатларини қоплагани юзасидан текширув бошланди.
Россиялик тадбиркордан юз минглаб долларлик «совға»: кичик Трамп атрофида можаро
Кичик Доналд Трампнинг тўйи билан боғлиқ можаро 14-15 сентабр кунлари ПроПублиса нашри чоп этган мақоладан кейин кучайди. Бу ерда гап маросимнинг ўзи ҳақида эмас, балки Баҳама оролларидаги ҳашаматли байрам учун ким ва қандай қилиб пул тўлагани устида кетмоқда.
2026-йил май ойида АҚШ президенти Доналд Трампнинг ўғли кичик Доналд Трамп (48 ёшда) модел ва кибор аёл Беттина Андерсонга (39 ёшда) турмушга чиқди. Никоҳни расмий рўйхатдан ўтказиш 21-май куни Флорида штатидаги Палм-Бичда бўлиб ўтди, тор доирадаги маросим эса 22-май куни ташкил этилди. Кейин эса Баҳама оролларидаги иккита хусусий оролда, жумладан Литтле Пипе Сайъда, уч кунлик базм ўтказилди. Меҳмонлар сони қарийб 50 нафар эди.
Таклиф этилганлар орасида Трампнинг яна бир ўғли Эрик ва куёви Жаред Кушнер ҳам бор эди. АҚШ президентининг ўзи тўйда қатнашмади — у Эрон атрофидаги вазият сабаб Вашингтонда қолган бўлиши мумкин. Дастлаб эр-хотин тўйни Оқ уйда ўтказиш вариантини ҳам кўриб чиққан, бироқ кейин бу фикрдан воз кечишган.
ПроПублиса маълумотига кўра, ҳужжатлар ва тадбирни ташкил этишдан хабардор бўлган уч манбага таянган ҳолда, харажатларнинг катта қисмини — юз минглаб долларни — россиялик тадбиркор ва спорт функсионери Умар Кремлёв (Умар Назарович Кремлёв, илгари Лутфуллоев, 1982-йилда туғилган) қоплаган.
Тўловлар Кремлёв раҳбарлик қиладиган Халқаро бокс ассоциацияси (ИБА) билан боғлиқ Дубайдаги ИБ Чалленгер компанияси орқали амалга оширилган. ИБА аввалроқ Россиянинг «Газпром» компанияси томонидан молиялаштирилган.