Трампга суиқасд уюштирилган пайтда ўқ еган эркак вафот этди

Трампга суиқасд вақтида ўқ теккан эркак вафот этди

Доналд Трамп ҳали АҚШ президентлигига номзод бўлган пайтда Пенсилваниядаги митингда унга қарши уюштирилган суиқасд чоғида яраланган икки томошабиндан бири — Жим Копенхавер вафот этди. Унинг айтишича, Копенхавер ўша пайтдаги жароҳатлари оқибатида ҳаётдан кўз юмган. У 76 ёшда эди.

Политисо нашрининг ёзишича, Трампга суиқасд пайтида Копенхавер икки марта ўқ еган. Улардан бири эркакнинг елкасига, иккинчиси эса умуртқа поғонаси яқинига тегиб, нервларга зарар етказган. У бир неча бор жарроҳлик амалиётини бошдан кечирган. Физиотерапиядан кейин ҳам чап оёғидаги увишиш ва карахтлик йўқолмаган.

АҚШ президенти марҳумнинг оиласига ҳамдардлик билдирди.

“Америкалик ватанпарвар ва жангчи Жеймс Копенхавер ҳамда унинг ажойиб оиласига Худо мададкор бўлсин. Унинг жойи жаннатда бўлсин”, деб ёзди Трамп Трутҳ Сосиалъда.

АҚШ Конгресси Вакиллар палатасидаги Республикачилар партияси фраксияси ҳам Копенхавернинг яқинларига ҳамдардлик изҳор қилди.

Доналд Трампга суиқасд 2024-йил 13-июл куни Пенсилвания штатининг Батлер шаҳрида, у сайловолди митингида нутқ сўзлаётган вақтда амалга оширилган эди. Трамп ўнг қулоғидан яраланган. Томошабинлар орасида Копенхавердан ташқари 57 ёшли Девид Датч ҳам жароҳат олган, 50 ёшли Кори Комператоре эса ҳалок бўлган. Ҳужумни амалга оширган 20 ёшли Томас Метю Крукс воқеа жойида Махфий хизмат снайперлари томонидан отиб ўлдирилган.

Шундан кейин ҳам Трамп қуролли ҳужум хавфига дуч келган. 2026-йил апрел охирида Вашингтон Ҳилтон меҳмонхонасида Оқ уй мухбирлари ассоциациясининг кечки овқати пайтида отишма юз берган. Тадбирда АҚШ президенти Доналд Трамп, унинг рафиқаси Мелания Трамп, вице-президент Жей Ди Венс ва бошқа юқори мартабали амалдорлар бўлган. Ҳодиса оқибатида Махфий хизмат ходимларидан бири яраланган.