2024 йилги Трамп сайловолди кампаниясининг Батлердаги митингида ўқ отилган эркак вафот этди
Қуролланган шахс Жим Копенҳаверга икки марта ўқ узган, шунингдек, яна бир кишини ўлдирган ва Трампнинг қулоғини ўқ билан тилиб ўтган.
Батлердаги 2024 йилги Трамп сайловолди митингида ўқ отилган эркак вафот этди
Копенҳейвер Трамп митингида ўқ теккан уч кишидан бири эди, улар қаторида қулоғини ўқ ялаб ўтган Трамп ҳам бор эди
Пенсильвания штатининг Батлер шаҳрида Дональд Трампнинг 2024 йилги президентлик сайловолди кампанияси митингида ўқ теккан уч кишидан бири олган жароҳатлари асоратлари туфайли вафот этди, деб хабар берди Пенсильвания бош прокурори.
76 ёшли Жим Копенҳейверга қуролланган шахс яқин атрофдаги томдан ўт очганда икки марта ўқ теккан эди. Ҳужум пайтида яна бир иштирокчи, Кори Комператоре ҳалок бўлган, Трампнинг эса қулоғини ўқ ялаб ўтган.
Аллегени округи тиббий экспертизасининг маҳаллий ОАВ билан бўлишган баёнотига кўра, Копенҳейвер чоршанба куни Пенсильвания штатининг Питтсбург шаҳридаги шифохонада вафот этган.
Қуролланган шахс, 20 ёшли Томас Крукс ўт очганидан кейин Махфий хизмат томонидан ўлдирилган.
Трамп ўзининг Truth Social ижтимоий тармоғидаги постида Копенҳейверни «ҳақиқий Америка ватанпарвари» деб таърифлади.
«Икки йилдан кўпроқ вақт олдин Пенсильвания штатининг Батлер шаҳрида ақлдан озган қуролли шахс бизнинг "Аввало Америка" ҳаракатимизни бўғишга ҳаракат қилди. Бунинг ўрнига, Жим ва Ватанимизни севадиган кўплаб бошқа ажойиб ватанпарварлар бизнинг умумий Эркинлик, Мустақиллик ва Адолат қадриятларимизни ҳимоя қилиш учун бирлашдилар», деди Трамп. «Қалбимиз ва дуоларимиз Копенҳейвер оиласи, айниқса унинг ажойиб рафиқаси Марианна билан».
Копенҳейвер оиласининг адвокати унинг АҚШ олдидаги бурчига содиқлиги «ҳаётининг белгиловчи қисми» бўлганини айтди.
«Фахрий сифатида у қуролли кучларда миллатимизга фахр билан хизмат қилди ва унинг ватанга бўлган муҳаббати ҳеч қачон сусаймади», деди адвокат BBC’нинг АҚШдаги ҳамкори CBS News телеканалига берган баёнотида.
Батлердаги митингдан бир йил ўтиб CBS телеканалига берган интервьюсида Копенҳейвер ва ўқ теккан учинчи иштирокчи Дэвид Дач яраланганидан кейин инфекциялар ва жарроҳлик амалиётларини бошдан кечирганларини айтишган эди.
Копенҳейвернинг қўли ва қорнига ўқ теккан эди. Бир йил ўтгач ҳам, ўқ унинг танасида, умуртқа поғонаси яқинида қолган эди, деб айтганди у CBS телеканалига ва бу унинг ҳасса билан юришига сабаб бўлган.
Дач ҳам, Копенҳейвер ҳам июнь ойида федерал ҳукуматни зарарни қоплаш учун судга бериб, Махфий хизмат уларни ҳимоя қила олмаганини ва шу сабабли уларнинг жароҳатлари учун жавобгар эканини даъво қилишган.
АҚШ Вакиллар палатасидаги республикачилар ҳам жума куни Копенҳейвер хотирасини ёдга олиб, ижтимоий тармоқдаги постда шундай дейишди: «Жим тасаввур қилиб бўлмайдиган қийинчиликларга куч ва қатъият билан бардош берди».