Трамп ва Си музокараларида сиёсий бурилишга эришилмади
АҚШ президенти Доналд Трамп ва Хитой раҳбари Си Жинпинг Оқ уйдаги музокараларда Тайван, Эрон, Украина ҳамда сунъий интеллект масалаларини муҳокама қилди. ДВ хабарига кўра, томонлар илиқ муносабатларни намойиш этган бўлса-да, муҳим сиёсий келишувларга эриша олмаган.
Трамп ва Си ўртасидаги музокараларда сиёсий бурилиш юз бермади
24-сентабр куни Трамп Си Жинпинг шарафига Оқ уйда тантанали давлат зиёфати ташкил этди. Тадбирда Американинг йирик технология компаниялари вакиллари, жумладан Тесла раҳбари Илон Маск, Аппле раҳбари Тим Кук ва ОпенАИ раҳбари Сем Алтман ҳам иштирок этди.
Трамп нутқида АҚШ ва Хитой ўртасидаги шахсий алоқаларга алоҳида эътибор қаратиб, икки давлат ҳеч қачон ҳозиргидек бир-бирини бунчалик яхши тушунмаганини айтди.
Си Жинпинг эса анча вазмин оҳангда чиқиш қилиб, ҳар икки давлат масъулиятли буюк давлатлар сифатида ҳаракат қилиши ва ўзаро муносабатларга янгича ёндашув топиши зарурлигини таъкидлади.
Зиёфатдан олдин бўлиб ўтган икки томонлама музокараларда Тайван масаласи ҳам муҳокама қилинди. Хитойнинг «Синхуа» давлат ахборот агентлигига кўра, Си Жинпинг АҚШни Тайван мустақиллигига қарши чиқишга чақирган.
ДВ ёзишича, Трамп май ойида Хитойга қилган ташрифидан сўнг Тайванга қарийб 14 млрд долларлик қурол-яроғ пакети етказиб берилишини тўхтатиб турган ва бу масалани музокара мавзуси деб атаган.
Си Жинпинг сунъий интеллект жадал ривожланаётган шароитда бу технология доимо инсон назоратида қолиши кераклигини айтган.
Хабарда келтирилган манбаларга кўра, зиёфатда технология соҳаси вакиллари қатнашганига қарамай, Трамп Америка технологиялари экспортига қўйилган қатъий чекловларни сақлаб қолиши кутилмоқда. Хитой эса бу чекловларни юмшатишга интилмоқда.
АҚШ ва Исроилнинг Эронга қарши уруши борасида ҳам томонларнинг позициялари яқинлашмаган. Си Жинпинг ўт очишни тўхтатиш режимига қайтиш тарафдори эканини билдирган.
Украина масаласи ҳам музокаралар кун тартибидан ўрин олган, бироқ хабарда бу йўналишда эришилган аниқ келишувлар тилга олинмаган.