Трамп Россияга қарши «дўзахий санксиялар»ни ҳозирча жорий этмасликка қарор қилди
АҚШ президенти Доналд Трамп Россия ва унинг нефт-газини энг кўп харид қиладиган давлатларга нисбатан бир қатор йирик чекловларни жорий этишни тўхтатиб турди. Оқ уй сайтида 16-октабр куни эълон қилинган фармонда бу қарор АҚШ миллий манфаатларига мос экани билдирилган.
Трамп Россияга қарши «дўзахий санксиялар»ни ҳозирча жорий этмасликка қарор қилди
ДВ хабарига кўра, бу чекловлар Трамп сентабр охирида имзолаган ва «дўзахий санксиялар» номи билан танилган Линдси Грем қонунида назарда тутилган эди. Қонун уларни 18-октабргача жорий этишни талаб қилган, бироқ миллий манфаатлардан келиб чиқиб, бу жараённи вақтинча тўхтатиш имконини ҳам берган.
Трамп шу ваколатдан фойдаланиб, тегишли қарор ҳақида Конгрессни хабардор қилган.
Хусусан, Россия товарларига 500 фоизлик қўшимча бож жорий этиш тўхтатиб турилди. Шунингдек, Россия нефти ва газининг энг йирик беш харидори қаторига кирувчи ҳамда Москвага санксияларни четлаб ўтишда энг фаол ёрдам бераётган давлатлар маҳсулотларига 100 фоизлик бож қўллаш ҳам кечиктирилди.
Фармоннинг амал қилиш муддати аниқ сана билан белгиланмаган. Чекловларни жорий этиш масаласи президент ва давлат котиби молия вазири ҳамда АҚШ савдо вакили билан маслаҳатлашиб, бунга зарурат бор деган хулосага келганида қайта кўриб чиқилади.
Бу қарор Грем қонуни қабул қилинишидан олдин Россияга нисбатан жорий этилган санксияларга тааллуқли эмас.
Аввалроқ, 9-октабр куни Трамп Россия дизел ёнилғисини АҚШ ва бошқа бозорларга етказиб бериш бўйича келишувга эришилганини эълон қилган эди. Уни амалга ошириш учун АҚШ Молия вазирлиги санксиялар туфайли тақиқланган айрим операцияларга 2027-йил 7-апрелгача рухсат берувчи лицензия чиқарган. Россия эса дизел экспортига қўйилган чекловларни муддатидан олдин бекор қилишини билдирган.
Ахиос манбаларининг айтишича, дизел келишуви Украина президенти Володимир Зеленский Трампнинг Россия нефтни қайта ишлаш заводларига зарбаларни тўхтатиш ҳақидаги бир неча илтимосини бажармаганидан кейин тузилган. Зеленский бундай ҳужумларни Россиянинг Украина энергетика обьектларига зарбалари тўхтатилиши эвазига бас қилишни таклиф этган.
Украина президенти дизел келишувини «урушга инвестиция» деб атаб, Вашингтонни ўт очишни тўхтатишга эришиш учун Москвага босимни кучайтиришга чақирган.