Трамп республикачилар ғалабаси учун ҳар бир америкалик сайловчига 5 минг доллардан ваъда қилди
У Республикачилар партиясининг Техас штати Даллас шаҳрида ўтган қурултойида буни «муваффақиятли компанияларнинг инвесторларга дивиденд тўлаши»га ўхшатган.
Трамп республикачилар ғалабаси учун ҳар бир америкалик сайловчига 5 минг доллардан ваъда қилди. У буни «муваффақиятли компанияларнинг инвесторларга дивиденд тўлаши»га қиёслади.
«Ягона чеклов шундаки, дивидендлар АҚШда сарфланиши керак. Биз пулларни Канадага бориб сарфлашингизни хоҳламаймиз. Биз сизнинг Хитойга, Германияга боришингизни истамаймиз... Сиз пулларни АҚШда сарфлашингиз керак», – дея қўшимча қилди Трамп.
Қайд этиш керакки, бу тарихда АҚШ президенти сайловчилар овозини жалб қилиш кампанияси доирасида америкаликларга бундай тўловлар ваъда қилаётган биринчи ҳолатдир.
Трамп кўпинча митинглар пайтида эътиборни жалб қилиш учун жуда ғайриоддий ғояларни илгари суриши билан танилган.
Ҳозирда Демократик партия аксар сўровларда етакчилик қилмоқда ва Вакиллар палатаси ва ҳатто Сенатни назорат қилиш учун яхши имкониятга эга.
Трамп АҚШ тарихида президент партияси оралиқ сайловларда мағлуб бўлиши кўп учраганини эслатиб, «Биз буни ўзгартиришимиз керак», – деди ва америкаликларни «бюллетенда Трамп исми кўрсатилгандек» овоз беришга чақирди.
Техасдаги чиқиши чоғида Трамп ноябр ойида Республикачилар партияси мағлубиятга учраши америкаликлар «чегараларни йўқотиши, солиқлар камайишидан маҳрум бўлиши ва хавфсизлигини бой бериши»ни англатишини айтди. «Сизни яна икки йил аввалгидек даҳшатли дўзах кутади», – дея қўшимча қилди АҚШ президенти. У АҚШ «бутун дунё учун масхара бўлгани», аммо ҳозир ҳеч ким унинг устидан кулмаётганини таъкидлади.