Трамп маъмурияти хорижлик талабалар учун амалиёт ўташ имкониятларини чекламоқчи
Трамп маъмурияти хорижлик талабаларга амалиёт ўташ рухсатномаларини (СПТ) беришни чеклаш бўйича кўрсатма эълон қилди. Талабга риоя қилмаган олийгоҳлар чет элликларни ўқишга қабул қилиш ҳуқуқидан маҳрум этилишидан огоҳлантирилгач, айрим университетлар аризаларни қабул қилишни тўхтатди.
АҚШ президенти Доналд Трамп маъмурияти университетлар учун хорижлик талабаларга амалиёт ўташ бўйича айрим турдаги рухсатномалар берилишини чеклашга қаратилган кўрсатма хатини эълон қилди, деб ёзмоқда
Федерал ҳукумат ушбу қоидаларга риоя қилмаган коллеж ва олийгоҳлар хорижлик талабаларни қабул қилиш ҳуқуқини берувчи сертификатдан маҳрум бўлиши мумкинлигидан огоҳлантирди.
24-август санаси билан қайд этилган федерал кўрсатмада айтилишича, АҚШ Иммиграция ва божхона назорати агентлиги (ИСЕ) таркибига кирувчи Талабалар ва алмашинув дастурлари ташрифчилари бўйича дастур (СЕВП) “ўқув дастурининг ажралмас қисми бўлган амалиётгагина рухсат берувчи меъёрий талабларни бузаётган кўринишдаги СПТ (Суррисулар Прастисал Траининг — ўқув дастури доирасидаги амалий машғулотлар) рухсатномалари сони ортиб бораётганини кузатган”.
“СЕВП қоидаларига риоя қилмаслик олий таълим муассасасининг чет эллик талабаларни қабул қилиш бўйича сертификати бекор қилинишига олиб келиши мумкин”, — дейилади хатда.
Ушбу огоҳлантириш ортидан Лос Анжелесдаги Калифорния университети (УСЛА) ва Берклидаги Калифорния университети (УС Беркелей) каби бир қатор олий ўқув юртлари хорижлик талабалар учун ишлашга рухсат бериш бўйича айрим аризаларни қабул қилишни вақтинча тўхтатди.
“УСЛА сўнгги федерал кўрсатмаларни ўрганиб чиқиш ва кейинги қадамларни белгилаш мақсадида муайян СПТ рухсатномаларини беришни вақтинча тўхтатиб қўйди”, — деди УСЛА матбуот котиби.
УС Беркелей халқаро бўлими 24-августдаги кўрсатмани “мазмунан торроқ, тўғридан тўғри ва кўпроқ чекловчи тусга эга” деб баҳолади. Федерал ҳукумат август ойи ўрталарида ҳам шу каби хабарнома чиқарганди. УС Беркелей халқаро бўлими “яқин келажакда” айрим ишлаш рухсатномалари аризаларини кўриб чиқиш эҳтимоли жуда паст эканини билдириб, хорижлик талабаларни шунга мос равишда режа тузишга чақирган.
Шу билан бирга, университет “дастур талаби” бўлган СПТ рухсатномаларини одатдагидек расмийлаштиришда давом этишини ҳамда “Докторлик диссертацияси ва магистрлик тезислари бўйича тадқиқот СПТ”ларини кўриб чиқишни қайта тиклашини маълум қилди. Бўлим янги федерал талабларга мос келадиган тартибларни ишлаб чиқиш учун ҳуқуқшунослар билан маслаҳатлашишини билдирди.
“Ушбу қоидаларда ҳеч нарса ўзгаргани йўқ”, — дейилади ИСЕ агентлигининг бош органи бўлган АҚШ Ички хавфсизлик вазирлиги баёнотида. “Бироқ университетлар ва иш берувчилар огоҳлантирилганини ҳисобга олишлари керак: президент Трамп даврида бундай сахий тизимни суиистеъмол қилишга ортиқ тоқат қилинмайди”.
Трамп Исроилнинг Ғазодаги ҳужумларига қарши ўтказилган Фаластин тарафдори бўлган намойишлар, хилма-хиллик ташаббуслари, иқлим дастурлари ва бошқа масалалар туфайли олийгоҳларни терговлар ва молиялаштиришни тўхтатиш таҳдидлари билан нишонга олмоқда. Ҳуқуқ ҳимоячилари бу борада сўз эркинлиги, академик эркинлик ва тегишли ҳуқуқий жараёнларнинг бузилиши юзасидан хавотир билдирмоқда.
Шунингдек, Трамп маъмурияти Фаластин тарафдори бўлган ва антисемитизм ҳамда экстремистларга хайрихоҳлик деб баҳоланган норозилик намойишларида қатнашган талабаларнинг визаларини ҳам бекор қилмоқда. Намойищилар, жумладан, айрим яҳудий гуруҳлари ҳам Исроилнинг Ғазога ҳужуми ва Фаластин ҳудудларини босиб олишига қарши чиқиш антисемитизм эмаслигини, Фаластин ҳуқуқларини ҳимоя қилиш эса экстремизмни қўллаб-қувватлаш билан бир нарса эмаслигини билдирмоқда.