Трамп Ҳўрмуз бўғозини АҚШ ҳудуди деб эълон қилди
Трамп ўзининг ТрутҳСосиал саҳифасида «АҚШ янги ҳудуди» деган ёзув билан Ҳўрмуз бўғози харитасини эълон қилди. Эрон ТИВ Америка президенти адашаётганини ва Теҳрон буни тез орада тузатишини маълум қилди.
Трамп Ҳўрмуз бўғозини АҚШ ҳудуди деб эълон қилди
АҚШ президенти Доналд Трамп ўзининг ТрутҳСосиал саҳифасида Ҳўрмуз бўғозининг харитасини "АҚШнинг янги ҳудуди" деган ёзув билан жойлаштирди.
Трамп 14-август куни Ҳўрмуз бўғозини АҚШ ҳудуди деб эълон қилиш ниятида эканлигини маълум қилган эди. Ўшанда Оқ уй раҳбари бу эълон Эрон билан уруш тугаганидан сўнг амалга оширилишини таъкидлаган.
Эртаси куни Эрон ташқи ишлар вазири ўринбосари Козим Ғарибободий бўғозни эгаллаб бўлмаслигини айтиб ўтди. Унинг сўзларига кўра, "Ҳўрмуз бўғозини на твит, на авиаташувчи, на буйруқ чиқариш, на сайловолди нутқи билан забт этиб бўлмайди".
АҚШ президентининг саҳифасидаги пост эълон қилингач, Ғарибободий Трампнинг Ҳўрмуз бўғозини АҚШ ҳудуди деб аташи хато эканлигини ва Эрон буни тез орада тузатишини билдирди. "Трамп абадий Форс кўрфази номини тўғри ёзганидек, унинг Ҳўрмуз бўғози борасидаги янглиш фикри ҳам тез орада ё тузатилади, ё биз бу адашган одамнинг хатоларини ўзимиз тузатамиз", — деб ёзди у ўзининг Х саҳифасида.
Яқин Шарқнинг кўплаб мамлакатларида кўрфаз Арабистон ёки Араб кўрфази деб аталади. Эрон бундай номланишга қарши чиқади. Форс кўрфази — унинг анъанавий географик номи бўлиб, ҳозирги Эрон жойлашган қадимги Форс (Персия) шарафига қўйилган.
Ўтган йилнинг май ойида Тҳе Ассосиатед Пресс икки америкалик амалдорга таяниб, АҚШ Форс кўрфазини Арабистон ёки Араб кўрфази деб аташи ҳақида хабар берган эди. Кейинроқ Трамп Эрон бу қадамга "қатъий эътироз билдиришини аниқ тушунтиргани" сабабли Форс кўрфазини Араб кўрфази деб қайта номлаш режаларидан воз кечган.