Трамп Фолкленд ороллари бўйича АҚШ позицияси қайта кўриб чиқилаётганини айтди
**Трамп Фолкленд ороллари бўйича АҚШ позициясини қайта кўриб чиқаётганини маълум қилди**
АҚШ президенти Доналд Трамп Буюк Британия бошқарувидаги Фолкленд ороллари бўйича Қўшма Штатлар позициясини қайта кўриб чиқаётганини эълон қилди. Бу ҳақда Реутерс ва Тҳе Гуардиан нашрлари хабар берди.
Овал кабинетда оролларнинг суверенитети ҳақидаги саволга жавоб берар экан, Трамп шундай деди: "Мен ҳар доим ҳар бир позицияни кўриб чиқаман. Бу кўплаб масалалардан фақатгина биттаси холос."
Трамп ушбу кўриб чиқиш АҚШнинг суверенитет борасидаги ёндашувини ўзгартириш-ўзгартирмаслигига аниқлик киритмади. Вашингтон 1982-йилдан бери бу масалада нейтрал позицияни эгаллаб келади. Трампнинг иттифоқчиси, Аргентина президенти Хавер Милей бошқараётган Аргентина ҳам бу ороллар устидан суверенитет даъво қилади.
Трампнинг бу баёнотлари АҚШ маъмурияти мазкур низодан Британиянинг янги бош вазири Энди Бернем ҳукуматига нисбатан босим ўтказиш воситаси сифатида фойдаланишга тайёрлигини кўрсатди. Мақсад Лондондан мудофаа харажатларини оширишни талаб қилишдир.
Ушбу баёнот ўтган ҳафтада исми ошкор этилмаган АҚШ расмийсининг Телеграпҳ нашрига берган интервюсидан сўнг янгради. Ўшанда расмий Вашингтон Британия мудофаа харажатлари бўйича мажбуриятларини бажармаса, ороллар бўйича ўз позициясини ўзгартириши мумкинлигини айтган эди.
Бундан олдин Британия ғазначиси Жон Ҳили 28-октябр куни ўзининг биринчи бюджетини тақдим этганда мудофаа харажатларини 2030-йилгача ялпи ички маҳсулотнинг 3 фоизига етказиш ҳақидаги аввалги мажбуриятдан воз кечишга тайёрланаётгани ҳақида хабарлар тарқалганди.
"АҚШ позициясининг ўзгариши Британиянинг Фолкленд устидан суверенитетига маънавий ва руҳий зарба бўлади", дейилади хабарда.
1982-йилда Аргентина оролларга бостириб кирганидан сўнг, Маргарет Тетчер ҳукумати ҳарбий-денгиз кучларини юборишга қарор қилган эди. Якунда оролларнинг қайтариб олиниши собиқ америкалик президент Роналд Рейганнинг қатъий дипломатик қўллаб-қувватлови билан кучайган. Вашингтон Аргентинанинг ҳукмрон ҳарбий хунтаси билан ҳам иттифоқчи бўлишига қарамай, у Британия томонида турган эди.
1982-йилнинг июн ойида Аргентина кучлари таслим бўлгунга қадар жангларда тахминан 649 нафар аргентиналик ва 255 нафар британиялик ҳарбий ҳалок бўлган. Бу воқеа сиёсий иттифоқчи ва ғоявий маслакдош бўлган Тетчер ҳамда Рейган ўртасидаги ришталарни мустаҳкамлашда марказий рол ўйнаган эди.
Охирги вақтларда Трамп Аргентинанинг популист президенти Хавер Милей билан яқинлашган. Милей 2025-йилнинг январ ойида Трампнинг иккинчи инаугурация маросимида қатнашганди.
Милей Аргентинанинг оролларга бўлган даъвосини фаол қўллаб-қувватлайди. Бироқ 2013-йилдаги сўровномада овоз берган 1517 нафар Фолкленд аҳолисининг 1513 нафари ушбу ҳудуд Британия таркибида қолишини исташини билдирган.
АҚШ позициясини ўзгартириш имконияти 2026-йил бошида Пентагонда кўриб чиқилган вариантлар қаторига киритилган эди. Бу чора Эрон билан урушдаги АҚШ ҳарбий операцияларини қўллаб-қувватламади деб ҳисобланган НАТО иттифоқчиларига босим ўтказиш учун мўлжалланган.
Аввалроқ Аргентинада мамлакатни танқид қилган хорижликлар депортация қилиниши ҳақида хабар берилганди. ЖЧ-2026 турниридан сўнг Аргентина термасига ёғилган айбловлар ортидан Хавер Милей мамлакат шаънини ҳимоя қилишга киришган. Президент имзолаган янги қарорга кўра, Аргентинани танқид қилган хорижликлар мамлакатдан чиқариб юборилади.