ТРАБ ва Ипотека-банк Vades Group’ни 10 миллион долларга қўллаб-қувватлади
Vades Group Тошкент вилоятида ишлаб чиқаришни кенгайтириш учун ТРТБ ва Ipoteka Bank’нинг хавф-хатарларни тақсимлаш механизми доирасида молиялаштирилади.
ТРАБ ва Ипотека-банк Vades Group’ни 10 млн долларга қўллаб-қувватлади
Марказий Осиёдаги ягона микропроцессорли карталар ишлаб чиқарувчиси бўлган Vades Group Европа тикланиш ва тараққиёт банки (ТРАБ) ҳамда Ipoteka Bank OTP Group’нинг хавф-хатарларни тақсимлаш механизми доирасида молиялаштирилади.
Битимнинг умумий ҳажми 10 млн долларни ташкил этади, шундан 5 млн доллари молиялаштириш учун тасдиқлаб бўлинган.
Битим имзолангани ҳақида ТРАБнинг Ўзбекистондаги ваколатхонаси директори ва раҳбари Анди Аранитаси маълум қилди. Ушбу битим ТРАБ ва Ипотека-банк ўртасидаги молиялаштириладиган хавф-хатарларни тақсимлаш дастури доирасидаги биринчиси бўлди.
Risk Sharing Facility (RSF) доирасида ТРАБ битим бўйича кредит хавфининг 50 фоизини ўз зиммасига олади. Бундай механизм Ипотека-банкка маҳаллий компаниялар ва инвестиция лойиҳаларини молиялаштиришни кенгайтириш имкониятини беради.
Жалб қилинган маблағларни Vades Group бизнесни кенгайтириш ва Тошкент вилоятининг Оҳангарон туманида янги ишлаб чиқариш корхонасини қуришга йўналтиради.
Янги завод компанияга банк карталари ва шахсни тасдиқловчи ҳужжатларни ишлаб чиқариш қувватларини ошириш имконини беради, шунингдек, маҳаллий ишлаб чиқаришни ривожлантиришга хизмат қилади.
Компания, шунингдек, янги ишлаб чиқариш линияларига сармоя киритиш ва маҳсулот турларини кенгайтиришни режалаштирмоқда. Банк карталари ва шахсни тасдиқловчи ҳужжатлардан ташқари, гап SIM-карталарни ишлаб чиқариш ҳақида ҳам бормоқда.
Молиявий кўмакдан ташқари, Vades Group ТРАБнинг маслаҳат кўмагида корпоратив бошқарув ва комплаенс стандартларини кучайтириш устида ишламоқда.
Компания аллақачон ISO 37001 стандартини жорий қилган ва GSMA SAS-UP аккредитациясидан ўтишга тайёргарлик кўрмоқда. Ушбу аккредитацияни олиш Vades Group’га янги халқаро бозорларга чиқиш имконини беради.
Vades Group учун ушбу келишув тараққиёт банкининг янги мижози сифатида ТРАБ билан ҳамкорликнинг бошланиши бўлди.
Ўз навбатида, Ipoteka Bank OTP Group ва ТРАБ ўртасидаги Risk Sharing Facility механизми учун ушбу операция биринчи субкредит бўлди.
Молиялаштириш Vades Group’нинг ишлаб чиқариш қувватларини кенгайтиришни ва Тошкент вилоятидаги янги корхона лойиҳасини амалга оширишни қўллаб-қувватлаши керак.