Тошкентнинг Глинка кўчасида асфальт остида юз берган портлаш сабабларини расмийлар аниқламоқда

Тошкентнинг Глинка кўчасида асфальт остида юз берган портлаш сабабларини расмийлар ўрганмоқда

Пайшанба куни Тошкент шаҳрининг Глинка кўчасида йўл қопламаси остида юз берган портлаш сабаблари аниқланмоқда, дея хабар берди Яккасарой тумани ҳокимлиги матбуот хизмати. Туман ҳокими Нилуфар Аллабергенова воқеа жойида бўлиб, ҳодиса оқибатларини кўздан кечирди.

Ҳокимликдан эслатишларича, яқинда Глинка кўчасида эскирган муҳандислик тармоқларини янгилаш ва қувурларни алмаштириш ишлари олиб борилган эди. Янги қувурлар мустаҳкамлик ва ишга яроқлиликка текширилган, бироқ тармоқлар ҳали фойдаланишга топширилмаган эди.

Ижтимоий тармоқларда эълон қилинган видеоларда портлашга ўхшаш овоз эшитилади, сўнгра воқеа жойи устида чанг кўтарилгани кўринади.

«Газета»нинг хабар беришича, йўлнинг ушбу қисмида асфальт ўпирилиб тушган, унинг парчалари эса ўнлаб метр масофага учиб кетган. Ўтиб кетаётган бир нечта машина шикастланган, расман бир нафар жабрланувчи ҳақида хабар берилган. Ҳозирда авария оқибатларини бартараф этиш ишлари олиб борилмоқда. Кўчанинг ушбу қисми ёпилган, ҳайдовчилардан уни айланиб ўтиш сўралмоқда.

«Газета» ўқувчиси Глинка кўчасининг август ойи бошида, у ерда таъмирлаш ишлари олиб борилаётган вақтда олинган фотосуратларини юборди. Ўрнатилган тўсиқда Industrial Construction деб ёзилган.

Тошкентнинг иссиқлик, сув ва газ таъминоти корхоналари ушбу ҳодиса тармоқлар билан боғлиқ эмаслигини маълум қилди.

Пойтахтнинг иссиқлик таъминоти тармоқларига хизмат кўрсатувчи Veolia Energy Tashkent компанияси кечқурун иссиқлик таъминоти қувурлари шикастланмагани ва бутун эканини, жорий йилда ўрнатилган, узунлиги 1240 метр бўлган магистрал эса бўш ҳолатда (сувсиз ва босимсиз) эканини маълум қилди.

«Шу тариқа, ҳодиса иссиқлик таъминоти тармоқларидан фойдаланиш ёки уларнинг ёрилиши билан боғлиқ эмас», — дея таъкидлади компания.