Тошкентда ЙПХ инспекторини BMW машинасида уриб юборган мактаб ўқувчиси 2 йилу 4 ойга қамалди
Тошкентдаги суд 16 ёшли мактаб ўқувчисини 2 йил-у 4 ой муддатга озодликдан маҳрум қилиш жазосига ҳукм қилди. Февраль ойида у ҳайдовчилик гувоҳномасига эга бўлмаган ҳолда, BMW M4 машинасида ЙПХ инспекторини уриб юборган эди. Кейинчалик ходим вафот этган. Ўсмир ўлимга сабаб бўлган қасддан баданга оғир шикаст етказишда айбдор деб топилди.
Тошкентда BMW машинасида ЙПХ инспекторини уриб юборган мактаб ўқувчиси 2 йил-у 4 ойга қамалди
Жиноят ишлари бўйича Миробод тумани суди Д. Тургуновга 2 йил-у 4 ой муддатга озодликдан маҳрум қилиш жазосини тайинлади. Айнан у февраль ойида Тошкентда BMW M4 автомобилида ЙПХ ходимини уриб юборган, оқибатда инспектор кейинчалик вафот этган эди.
Жиноят иши ёпиқ суд мажлисида кўриб чиқилди. Ҳодиса содир бўлган вақтда 2010 йилда туғилган Тургунов хусусий мактабнинг 10-синфида таҳсил олаётган эди.
Суд уни Жиноят кодексининг 104-моддаси 3-қисми «д» банди (жабрланувчининг ўлимига сабаб бўлган қасддан баданга оғир шикаст етказиш) билан айбдор деб топди.
Вояга етмаганларга жазо тайинлашни тартибга солувчи ЖКнинг 85-моддаси инобатга олиниб, ўсмирга 2 йил-у 4 ой муддатга озодликдан маҳрум қилиш жазоси тайинланди.
Жазо муддати унга нисбатан қамоққа олиш тарзидаги эҳтиёт чораси қўлланилган кун — 2026 йил 27 февралдан бошлаб ҳисобланади.
«Газета» 25 февраль куни кечқурун Тошкент марказидаги Нукус кўчасида ҳайдовчилик гувоҳномасига эга бўлмаган 16 ёшли мактаб ўқувчиси бошқарувидаги BMW M4 автомобили Йўл-патруль хизмати ходимини уриб юборгани ҳақида хабар берган эди.
Ҳуқуқ-тартибот идораларидаги манба маълумотларига кўра, инспектор рация орқали қоидабузарлик билан ҳаракатланаётган автомобиль ҳақида хабар олган ва уни тўхтатиш чораларини кўрмоқчи бўлганида, машина уни уриб юборган.
ЙПХ ходими, кичик сержант Ҳосилбек Бекназар ўғли Эшназаров оғир жароҳатлар олиб, шифохонага ётқизилган. У авариядан кейин ҳушига келмай, шифохонада вафот этган. Президент уни вафотидан кейин «Жасорат» медали билан мукофотлади.
Дастлаб Миробод тумани прокуратураси томонидан ЖКнинг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш, ўртача оғир ёки оғир шикаст етказилишига сабаб бўлиши) билан жиноят иши қўзғатилган эди.
Кейинчалик иш ЖКнинг 104-моддаси 3-қисми «д» банди (жабрланувчининг ўлимига сабаб бўлган қасддан баданга оғир шикаст етказиш) бўйича кўриб чиқила бошланди.
Шунингдек, ўсмирнинг ота-онаси муқаддам икки марта маъмурий жавобгарликка тортилгани хабар қилинган эди.
2025 йил сентябрь ойида мактаб ўқувчисининг дарсларни қолдиргани сабабли, 2026 йил январида эса автомобилни ўзбошимчалик билан бошқаргани ва Йўл ҳаракати қоидаларини қўпол равишда бузганидан кейин чоралар кўрилган.
ИИВ, шунингдек, BMW M4 автомобили 2002 йилда туғилган Лейла Атадияновага тегишли эканини маълум қилганди. Вазирлик маълумотларига кўра, у 2024 йилдан буён 18 марта автомобилларни ҳайдовчилик гувоҳномаси бўлмаган шахсларга бошқариш учун топширган ва 37 марта бошқа қўпол ЙҲҚ бузилишига йўл қўйган.
Февраль ойидаги тўқнашувдан сўнг, ўсмир ИИВ томонидан эълон қилинган видеода муқаддам автомобилни бошқаргани учун огоҳлантириш олганини тан олган.
«Ўтган сафар ходимлар мени огоҳлантиришганди. Мен бошқа машина ҳайдамайман деб ваъда бергандим. Лекин яна қоидани бузиб, рулга ўтирдим. Менинг барча ҳаракатларим нотўғри. Мен жабрланган ходимдан, унинг ўзидан, оиласидан, ота-онасидан узр сўрайман», — деган эди у.