Тошкентда халқаро мода академияси очилади
Тошкентда халқаро мода академияси очилади
Ўзбекистонда енгил саноат учун мутахассислар тайёрлайдиган Тошкент халқаро мода академияси ташкил этилади.
Ўқув юрти давлат олий таълим муассасаси мақомини олади, машғулотлар эса 2026/2027 ўқув йилидан бошланади. Келажакда бу ерда дуал таълимни жорий этиш ва ётоқхона очиш ҳам режалаштирилган.
Янги академия Енгил саноатни ривожлантириш агентлиги тизимида фаолият юритади. У Тошкент тўқимачилик ва енгил саноат институти ҳамда Париж халқаро мода академиясининг қўшма таълим дастури негизида ташкил этилади.
Ушбу қўшма дастур бўйича аллақачон таҳсил олаётган талабалар ўқишини янги академияда давом эттирадилар. Битирувчиларга академия дипломи берилади.
Қўшма дастурлардан ташқари, олий ўқув юрти бакалавриат йўналишлари ва магистратура мутахассисликлари бўйича мустақил равишда мутахассислар тайёрлай олади.
2027/2028 ўқув йилидан бошлаб дуал таълимни жорий этиш режалаштирилмоқда. У ўқишни амалий тайёргарлик билан бирлаштирган ҳолда, аниқ компания ва ташкилотларнинг буюртмалари бўйича тўқимачилик, тикувчилик, трикотаж ва чарм-поябзал корхоналари учун мутахассислар тайёрлаш имконини беради.
Академия, шунингдек, давлат буюртмаси бўйича турли компаниялар учун формали кийимлар дизайнини ишлаб чиқиш билан шуғулланади. Миллий брендларни шакллантириш ва ривожлантириш яна бир йўналишга айланади.
Енгил саноат техникумлари битирувчилари учун ўқишни давом эттиришнинг алоҳида имконияти кўзда тутилади. 2027/2028 ўқув йилидан бошлаб соҳавий техникумни муваффақиятли тамомлаган ва ўртача балли академия томонидан белгиланган кўрсаткичдан кам бўлмаган битирувчилар тўғридан-тўғри бакалавриатнинг учинчи босқичига киришлари мумкин бўлади. Ўқиш тўлов-контракт асосида амалга оширилади.
Хорижий ўқитувчилар, мутахассислар ва талабаларни жалб қилиш учун кўп марталик визаларни расмийлаштириш ва муддатини узайтириш ҳамда рўйхатдан ўтказиш кўзда тутилган. Ушбу чора-тадбирлар академиянинг маъмурий ходимлари ва уларнинг оила аъзоларига ҳам татбиқ этилади.
Янги олий ўқув юрти талабалари учун 2028 йил охиригача 400 ўринли ётоқхона қурилади. Бунгача Тошкент тўқимачилик ва енгил саноат институтидан ўтказилган талабалар аввалги институтнинг ётоқхонасидан фойдаланишлари мумкин бўлади.
Ўзбекистон матолари ва нақшлари — атлас ва адрас — глобал трендлар билан ҳамоҳанг экани маълум бўлди.