Тошкентда талабалар турар жойи 195,7 млрд сўмга сотувга қўйилди
Тошкентнинг Олмазор туманида Тошкент давлат юридик университетининг 1 гектар майдондаги ётоқхонаси аукционга қўйилди. Объект 195,7 млрд сўмга баҳоланмоқда. Харидор ундан фақат у ерда жойлашган давлат ташкилотлари ТДЮУнинг Янги Тошкентдаги янги кампусига кўчиб ўтганидан кейин фойдаланиши мумкин бўлади.
Тошкентда қиймати 195,7 млрд сўмлик талабалар ётоқхонаси сотувга қўйилди
Ўзбекистон Давлат активларини бошқариш агентлиги Тошкент шаҳрининг Олмазор туманидаги талабалар ётоқхонаси биноси сотилишини эълон қилди.
Объект Кичик ҳалқа автоулов йўли билан кесишган жой яқинида, «Зиё» маҳалласи, Талабалар кўчаси, 2-уй манзилида жойлашган. У тўртта талабалар ётоқхонасидан иборат мажмуа таркибига киради. Ҳозирда бу ерда Тошкент давлат юридик университетининг 2-сонли ётоқхонаси жойлашган.
Бино ва иншоотларнинг умумий майдони 8972 кв. м ни, ер майдони эса 1,02 га ни ташкил этади. Объект сув таъминоти, газ, электр таъминоти ва канализацияга уланган. Лот бўйича аукцион 4 ноябрь куни соат 10:00 га белгиланган.
Объектнинг бошланғич нархи — 195,66 млрд сўм, закалат миқдори — 5,87 млрд сўм бўлиб, бу бошланғич қийматнинг 3% ини ташкил қилади.
Хусусийлаштиришга Вазирлар Маҳкамасининг 2026 йил 2 июлдаги 361-сонли қарори асос бўлди. Ушбу ҳужжат ёпиқ ҳолда қабул қилинган ва lex.uz қонунчилик базасида мавжуд эмас.
Сотувнинг асосий шартларидан бири объектни янги эгасига топширишни кечиктириш ҳисобланади.
Эълонда кўрсатилишича, бинолардан фойдаланаётган давлат ташкилотлари Тошкент давлат юридик университетининг (ТДЮУ) замонавий кампусига кўчиб ўтганидан кейин уларни бўшатиб бериши керак.
Фақат шундан кейингина объект харидорга топширилади ва у кўчмас мулкдан фойдаланиш ҳуқуқига эга бўлади. Шу билан бирга, аукцион шартларида бинонинг аниқ қачон бўшатилиши кўрсатилмаган.
Тошкент давлат юридик университетининг янги кампуси қурилиши президентнинг 2025 йил 26 ноябрдаги фармонида назарда тутилган.
Ҳужжатга кўра, университет Янги Тошкент ҳудудида замонавий кампусга эга бўлиши керак. Лойиҳани амалга ошириш учун халқаро молия институтлари, хорижий банклар ва қурилиш компаниялари маблағларини жалб қилиш режалаштирилмоқда. Лойиҳалаш ва қурилиш ишлари 2025−2028 йилларга мўлжалланган.
2026 йил 17 октябрь куни Янги Тошкентда Адлия вазирлиги ва ТДЮУнинг янги бинолари пойдеворига тамал тоши қўйиш маросими бўлиб ўтди. Тадбирда адлия вазири Акбар Тошқулов иштирок этди.
Тошкент давлат юридик университетининг (ТДЮУ) амалдаги кампуслари ҳудудида Ўзбекистон ҳуқуқ тарихи музейи, Ўзбекистон низоларни ҳал этиш маркази, шунингдек, университет ҳузуридаги Рақамли ҳуқуқ ва рақамли суд экспертизаси марказларини жойлаштириш режалаштирилмоқда.