Тошкентда қозоғистонлик ёш футболчилар заҳарланиш гумони билан шифохонага ётқизилди
Тошкентда ўтказилаётган «Дўстлик Суп 2026» халқаро футбол фестивалида иштирок этаётган қозоғистонлик ёш спортчиларнинг соғлиғи ёмонлашди
Тошкентда қозоғистонлик ёш футболчилар заҳарланиш гумони билан шифохонага ётқизилди
Тошкентда бўлиб ўтаётган «Дўстлик Суп 2026» халқаро футбол фестивалида қатнашаётган қозоғистонлик ёш спортчиларнинг аҳволи ёмонлашди.
Маълумотларга кўра, 31-октябр куни пойтахтдаги меҳмонхоналардан бирида нонушта қилган Қарағанда шаҳридан келган ёш футболчиларда қорин оғриши ва тана ҳароратининг кўтарилиши кузатилган. Бир сутка ичида 15 нафар болада шу каби аломатлар қайд этилгани айтилмоқда.
Ота-оналарнинг сўзларига кўра, нонуштада тухум истеъмол қилмаган 8 нафар болада касаллик белгилари кузатилмаган. Бироқ заҳарланишга айнан қайси маҳсулот сабаб бўлгани ҳозирча аниқланмаган.
Тошкентдаги шифокор болаларга дастлабки «заҳарланиш» ташхисини қўйгани айтилмоқда. Ҳозирча лаборатория текширувлари натижалари маълум эмас.
«Тиббий ёрдамга муҳтож барча Қозоғистон фуқаролари Ўзбекистоннинг ихтисослаштирилган тиббиёт муассасаларига ётқизилган. Уларга зарур шифокорлик ёрдами кўрсатилмоқда. Қозоғистон дипломатлари жабрланганларнинг яқинлари ва тиббиёт муассасалари билан алоқада бўлиб, вазиятни доимий назоратда ушлаб турибди», – дейилади Қозоғистон Ташқи ишлар вазирлиги ахборотида.
Ҳозирча заҳарланиш манбаси лаборатория таҳлиллари билан тасдиқланмаган.
Маълумот учун, мазкур футболчилар 2008-йилда туғилган бўлиб, «Дўстлик Суп 2026» турнирида иштирок этиш учун келган. Мусобақа расмийларига кўра, жабрланганларга ўз вақтида ёрдам кўрсатилган ва ҳодиса нима сабабдан юз бергани ўрганилмоқда.