Тошкентда ноқонуний қурилган 61 та кўп қаватли бино аниқланди — Қурилиш ва уй-жой коммунал хўжалиги вазирлиги
Олий Мажлис Қонунчилик палатасидаги муҳокама чоғида қурилиш ва уй-жой коммунал хўжалиги вазири Тошкентда ноқонуний қурилган кўп қаватли уйлар сони 720 тани ташкил этишини янглиш кўрсатиб ўтди.
Тошкентда 61 та ноқонуний қурилган кўп қаватли бино аниқланди — Қурилиш ва уй-жой коммунал хўжалиги вазирлиги
Қурилиш ва уй-жой коммунал хўжалиги вазирлиги Тошкент шаҳрида ноқонуний қурилган кўп қаватли уйлар сони бўйича маълумот келтирди.
Қайд этилишича, Олий Мажлис Қонунчилик палатасидаги муҳокамалар давомида Қурилиш ва уй-жой коммунал хўжалиги вазирининг жавобида Тошкент шаҳрида ноқонуний қурилган кўп қаватли уйлар сони 720 тани ташкил этиши айтилган эди.
Вазирлик маълумотига кўра, Тошкент шаҳрида жами 320 дан ортиқ ноқонуний қурилиш объектлари аниқланган. Ушбу кўрсаткич турли тоифадаги бино ва иншоотларни, шу жумладан якка тартибдаги уйлар ва кичик объектларни — дўконлар, савдо шохобчалари, кичик павильонлар ва бошқа қурилмаларни ўз ичига олади. Муҳокамада тилга олинган кўп қаватли уйлар сони эса 61 тани ташкил этади.
«Биз томонимиздан тақдим этилган жавобда қурилиш объектларининг умумий сони кўп қаватли уйлар сони сифатида кўрсатиб ўтилган. Ушбу хатолик учун узр сўраймиз», — дейилади вазирлик хабарида.
Аввалроқ пойтахт ҳокимлигининг Қурилиш масалалари бўйича котибияти раҳбари Жасур Каримов Kun.uz'га Тошкентдаги охирги хатлов якунларига кўра, 70 дан ортиқ объектдаги 173 та кўп қаватли уйда қурилиш қонунчилиги бузилгани аниқланганини маълум қилган эди.