Тошкентда ичига гашиш яширилган қўғирчоқ билан аёл қўлга олинди
Тошкентнинг Бектемир туманида ичига умумий вазни 1,2 кг гача бўлган гашиш яширилган қўғирчоқ билан бир аёл қўлга олинди. Ушланган шахс юкни етказиб бериш эвазига унга 200 доллар ваъда қилишганини маълум қилди.
Тошкентнинг Бектемир туманида ичида болалар ўйинчоғига гашиш яширилган аёл қўлга олинди, деб хабар берди Ўзбекистон Ички ишлар вазирлиги матбуот хизмати.
Ушлаб олиш Тошкент вилояти ИИББ Кибержиноятларга қарши курашиш бошқармаси ва Нурафшон шаҳар ИИБ ходимларининг рейд тадбири давомида амалга оширилди.
Тезкор ходимлар интернетдан олинган хабар асосида Nexia 3 автоуловини тўхтатиб, 56 ёшли аёлнинг буюмларини текширишди.
Пакетлардан бирида қўғирчоқ бор эди, унинг вазни ҳуқуқ-тартибот идоралари ходимларида шубҳа уйғотди. Ўйинчоқ очиб кўрилганда, унинг бош қисмидан ўткир ҳидли, тўқ жигарранг рангли, саккизта ўрамда гашиш топилди. Ҳар бир ўрамнинг вазни 100 граммдан 150 граммгача эди.
Тошкент вилояти ИИББ маълумотларига кўра, аёл гиёҳвандлик моддаларини сотиш учун Фарғона вилоятидан Тошкентга олиб келаётган бўлган.
ИИВ томонидан эълон қилинган видеода аёл таниши пакетларни топширгани учун 200 доллар беришни ваъда қилганини айтган.
ИИВ Жиноят кодексининг 273-моддаси 6-қисми (Гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш жуда кўп миқдорда, шунингдек уюшган гуруҳ томонидан ёки унинг манфаатларини кўзлаб, телекоммуникация тармоқларидан ёки интернетдан фойдаланиб содир этилган бўлса) бўйича жиноят иши қўзғатилганини маълум қилди. Модда санкцияси 15 йилдан 20 йилгача озодликдан маҳрум қилиш жазосини назарда тутади.
2025 йилнинг февраль ойида Сурхондарёдаги «Айритом» постида катта миқдордаги гиёҳвандлик моддаси — супурги соплари ичида Ўзбекистонга олиб киришга уринилган, қиймати 16,5 млн доллардан ортиқ бўлган 612 кг гашиш ушланган эди.