Тошкентда фуқаро 683 минг долларлик криптовалютани ноқонуний айирбошлагани аниқланди
Тошкентда фуқаро 683 минг долларлик криптовалютани ноқонуний айирбошлагани маълум бўлди
Тошкентда 41 ёшли фуқаро ноқонуний тарзда жуда катта миқдордаги криптоактивлар айланмаси билан шуғулланиб келгани аниқланиб, унга нисбатан жиноят иши қўзғатилди.
Аниқланишича, 1985-йилда Қашқадарё вилоятида туғилган, Тошкент шаҳрида яшовчи фуқаро Ўзбекистон қонунчилигида белгиланган тартибда лицензия олмасдан, мобил телефони орқали Бинансе халқаро криптобиржасида махсус аккаунт очиб, 2021-йилдан 2025-йилгача жами 700 га яқин криптоактивлар олди-сотди операцияларини амалга оширган. У дастлабки қиймати 683 минг АҚШ доллари, яъни 9 миллиард сўмдан ортиқ бўлган криптовалютани қонунга хилоф равишда ўтказиш ва айирбошлаш билан шуғулланиб келган.
Мазкур ҳолат бўйича Қашқадарё вилояти Ички ишлар бошқармаси кибержиноятларга қарши курашиш бошқармаси тергов бўлими томонидан фуқарога нисбатан Жиноят кодексининг 278-8-моддаси (крипто-активлар айланмаси соҳасидаги қонунчиликни бузиш) 3-қисми “а” банди билан жиноят иши қўзғатилиб, дастлабки тергов ҳаракатлари олиб борилмоқда.
Шу йилнинг март ойида Наманганда қарийб 1 млрд сўмлик ноқонуний крипто операциялари билан шуғулланган шахсга жиноят иши қўзғатилгани ҳақида хабар берилган эди.