Тошкентда 24 мингдан ортиқ югурувчи иштирокида халқаро ярим марафон бўлиб ўтди
Тошкентда 24 мингдан ортиқ югурувчи иштирокида халқаро ярим марафон бўлиб ўтди
Пойтахтда "Ташкент Интернатионал Ҳалф Маратҳон" халқаро ярим марафони бўлиб ўтди, унда 5 ва 21,097 километр масофаларга ўтказилган югуриш мусобақалари 24 мингдан ортиқ иштирокчини бирлаштирди.
Расмий очилиш маросимида мамлакат раҳбарияти вакиллари иштирок этиб, Ўзбекистонда оммавий спорт йилдан-йилга ривожланиб бораётганини ҳамда бу каби мусобақалар аҳоли ўртасида соғлом турмуш тарзини тарғиб қилишда муҳим аҳамиятга эга эканини таъкидладилар.
Мусобақа якунларига кўра, эркаклар ўртасида 5 километр масофага югуришда Элдор Ботиров ғалаба қозонди, иккинчи ўринни Руслан Хаджиев, учинчи ўринни эса Беҳруз Шавкатов эгаллади. Аёллар ўртасида 5 километр масофага югуришда Алина Хакимова биринчи бўлди, Мафтуна Аҳмедова маррага иккинчи бўлиб етиб келди, совриндорлар учлигини эса Камола Аблаева якунлаб берди.
Эркаклар ўртасида 21,097 километр масофага ярим марафон баҳсларида биринчи ўринни Андрей Петров эгаллади, кумуш медаль Ҳасан Мирсоатовга, бронза эса Бахтиёр Ўткировга насиб этди. Аёллар ўртасида худди шу масофада Маржона Аҳмадалиева энг яхши натижани кўрсатди, Садафбону Нусратуллоева иккинчи, Арофатхон Имомалиева эса учинчи бўлди.