Тошкентда 100 та туристик ва гастрономик кўча ташкил этилади
Тошкентда 100 та туристик ва гастрономик кўча ташкил этиш режалаштирилмоқда
2030 йилгача Тошкентда 100 та гастрономик, туристик, сайр қилиш учун мўлжалланган ва туну кун фаолият юритадиган кўчалар очиш кўзда тутилган. Улар пойтахтнинг барча 12 та туманида пайдо бўлади.
Бундай кўчаларнинг энг кўп сони Чилонзор туманида режалаштирилган — 11 та. Мирзо Улуғбек, Сергели, Юнусобод ва Янгиҳаёт туманларида 10 тадан, Миробод, Олмазор, Шайхонтоҳур, Яккасарой ва Яшнобод туманларида саккизтадан кўча ташкил этилади. Учтепа туманида олтита, Бектемир туманида эса учта кўча яратилади.
Лойиҳаларни амалга ошириш учун 2026 йилда давлат бюджетининг тежаб қолинган маблағлари ҳисобидан 175 миллиард сўм ажратилади. 2030 йилгача бундай кўчаларни ташкил этишга босқичма-босқич жами 1 триллион сўм йўналтирилади.
Бундан ташқари, Тошкентдаги Тарас Шевченко туристик кўчаси яна қарийб 400 метрга узайтирилади. Янги ҳудудни ободонлаштириш ҳамда сайр қилиш, ҳордиқ чиқариш ва тадбиркорлик учун жамоат жойлари билан тўлдириш режалаштирилган.