Тошкентда 100 та кўча янгиланади ва 400 та маҳалла ободонлаштирилади

Тошкентда 100 та кўчани янгилаш ва 400 та маҳаллани ободонлаштириш режалаштирилмоқда

Бу йил пойтахтнинг 12 та тумани бўйича 9 миллиард доллар инвестиция жалб қилиш кўзда тутилган, бироқ президент раислигидаги видеоселектор йиғилишида бу ишларни жадаллаштириш зарурлиги таъкидланди.

Инвесторларнинг масалаларини тезкор ҳал этиш учун янги тартиб жорий этилмоқда: республика ва шаҳар даражасидаги масъул раҳбарлар ҳар ҳафта туманларга бориб, тадбиркорлар билан учрашувлар ўтказади, мураккаб масалалар бўйича асослантирилган таклифлар эса ўша куннинг ўзида Президент Администрациясига юборилади. Келаси йил учун 10 миллиард доллар инвестиция жалб этиш ва 150 мингдан 200 минггача доимий, юқори даромадли иш ўринлари яратиш вазифаси қўйилди.

Йиғилишда Олмазор тумани мисолида кўча ва маҳаллаларни комплекс ривожлантиришга алоҳида эътибор қаратилди. Йил бошидан буён тумандаги 9 та кўча бизнес ва туризм учун жозибадор ҳудудларга айлантирилди, жумладан, «Кичкирик» маҳалласида 450 ўринли болалар боғчаси, спорт майдончалари, хиёбон, амфитеатр, пиёдалар йўлаклари ва фавворалар барпо этилиб, 5,5 минг кишининг яшаш шароити яхшиланди. Ушбу тажрибани Олмазор туманидаги яна 8 та кўчада ҳамда пойтахтнинг қолган 11 та туманидаги 3-4 тадан кўчада оммалаштириш режалаштирилган.

Тошкентнинг 100 та кўчасини комплекс янгилаш учун 1 триллион сўм ажратилди. Бундан ташқари, «Кичкирик» маҳалласи намунасида 400 та маҳаллани ободонлаштириш бўйича қиймати 10 триллион сўмлик тўрт йиллик дастур тайёрланмоқда, бунда барча режалаштирилаётган ўзгаришлар маҳаллий кенгашларда муҳокама қилиниши ва аҳолига етказилиши лозим.

Учрашув давомида пойтахтнинг тарихий қисмини ривожлантириш ва давлат кўчмас мулкидан самарали фойдаланиш масалалари ҳам кўриб чиқилди. 1 ноябрга қадар хорижий компанияларни жалб қилган ҳолда Эски шаҳарни комплекс ривожлантириш бўйича ягона концепция ва лойиҳалар портфели тайёрланади.

Бундан ташқари, раҳбарларга умумий майдони 765 минг квадрат метр бўлган давлат органларининг 497 та маъмурий биносини хатловдан ўтказиш топширилди, бундан мақсад самарасиз фойдаланилаётган майдонларни тадбиркорларга савдо, хизмат кўрсатиш, хусусий тиббиёт ва таълим соҳалари учун узоқ муддатли ижарага беришдир.