Тошкент вилоятида Қозоғистон фуқаросини дўппослаб, 300 млн сўмини тортиб олган жиноий гуруҳга суд ҳукми ўқилди

Тошкент вилоятида Қозоғистон фуқаросини дўппослаб, 300 млн сўмини олиб қўйган жиноий гуруҳга суд ҳукми чиқарилди

Тошкент вилоятининг Тошкент туманида, чегара божхона пости яқинида Қозоғистон фуқаросини дўппослаб, ундан 300 млн сўмни тортиб олган тўрт нафар шахсга нисбатан суд ҳукми ўқилди.

Воқеа 2025-йил 10-октябр куни соат 23:30 лар атрофида Тошкент туманидаги “Навоий” чегара божхона пости яқинида юз берган.

Маълум бўлишича, Қозоғистон фуқароси Т.Д. Ўзбекистондан Қозоғистонга нақд пул олиб ўтиб, уни эгаларига етказиб бериш билан шуғулланган. Бу ишда унинг уч-тўрт нафар шериги ҳам бўлган. Чегарадан бир киши фақат 100 млн сўмгача пул олиб ўтиши мумкинлиги сабабли, катта сумма шериклар ўртасида тақсимлаб олинган.

2025-йил 9-октябр куни таниши Л.Э. унга қўнғироқ қилиб, Ўзбекистондан пул олиб келишда ёрдам беришни сўраган. Таклифга рози бўлган Т.Д. соат 19:00 лар атрофида “Қоплонбек” чегара божхона пости орқали Ўзбекистонга кирган. Уни пост яқинида шериги ҳамда У. исмли шахс Гентра автомобилида кутиб олган. Эркак машинада кетаётганида тўртта полиетилен пакетга жойланган 400 миллион сўмни олган.

Т.Д. пакетларни кўтариб, чегара пости томон пиёда кетаётган пайтда ортидан икки киши кузатиб келаётганини сезган. У шерикларига қўнғироқ қилишга уринган, бироқ Ўзбекистон ҳудудида Қозоғистон мобил алоқа тармоғи ишламагани учун улар билан боғлана олмаган.

“Тахминан 200 метр юрганимдан сўнг йўлнинг қоронғи қисмига етиб келдим. Кутилмаганда кимдир юзимга кетма-кет зарба берди, яна бир киши эса орқамдан урди. Шунда қўлимдаги пакетлар ерга тушиб, пуллар сочилиб кетди”, дея кўрсатма берган жабрланувчи.

Ҳужум қилганлар учта пакетдаги жами 300 млн сўмни олиб, воқеа жойидан қочиб кетган. Т.Д. эса қолган битта пакет билан чегара постига етиб бориб, ҳуқуқни муҳофаза қилувчи органларга мурожаат қилган.

Терговда аниқланишича, ҳужум тасодифий бўлмаган. Бир маҳаллада яшовчи А.М., Ш.Ж., Ф.С. ва Н.С. чегара пости олдида Қозоғистонга катта миқдорда пул олиб ўтадиган фуқаролар ҳақида олдиндан билган ва уларни босқинчилик йўли билан талашни режалаштирган. Режага кўра, А.М. ва Ш.Ж. атрофни кузатиб туриши, Ф.С. ва Н.С. эса фуқароларга ҳужум қилиши керак бўлган.

Бироқ воқеа чегара пости яқинидаги логистика марказига ўрнатилган кузатув камераларига тушиб қолган. Тасвирларда Т.Д. автомобилдан тушгач, унинг ортидан Спарк келиб тўхтагани, машинадан бир киши тушгани ва яна бир эркак дарахт ортидан чиқиб, унга ташлангани акс этган. Автомобилнинг давлат рақами орқали гумонланувчилар аниқланган.

Тинтув чоғида Ш.J.ning яшаш хонадонидаги ҳожатхона томидан 211,5 млн сўм топилган.

“Аввал унинг таклифига рози бўлмадим. Кейин моддий томондан қийналиб турганим сабабли рози бўлдим. Жабрланувчини мен урмаганман, уни ъНурикъ урган. Мен ерга сочилган пулларни йиғиб олганман”, дейди судда Ф.С.

А.М., Ш.Ж. ва Н.С. эса судда айбини тан олмаган. Ш.J.ning айтишича, А.М. унга 22 та тахламдаги пулни “мижозимники” деб вақтинча сақлаш учун қолдирган. У пуллар қаердан олинганини билмаганини билдирган.

“Пулларни уйга олиб кириб, оила аъзоларим нотўғри тушунмаслиги учун ҳожатхона томига яшириб қўйдим. Уларнинг ичидан бир сўм ҳам олмаганман”, дея кўрсатма берган Ш.Ж.

А.М. эса пулларни унга Ф.С. олиб келганини ва “ўзимники” деб айтганини маълум қилган. Н.С. ҳам жабрланувчига ҳужум қилмаганини айтиб, терговда босим остида кўрсатма берганини даъво қилган.

Судда жабрланувчи етказилган зарар тўлиқ қопланганини билдириб, судланувчиларга нисбатан даъвоси йўқлигини маълум қилган.

Жиноят ишлари бўйича Зангиота туман суди ҳукмига кўра, Ф.С., А.М., Ш.Ж. ва Н.С. Жиноят кодексининг 164-моддаси 4-қисми (“а” банди) билан айбли деб топилган. Уларга Жиноят кодексининг 57-моддаси қўлланиб, ҳар бирига саккиз йилдан озодликдан маҳрум қилиш жазоси тайинланган.