Тошкент вилоятида чиқиндиларни электр энергиясига қайта ишлаш заводи қурилмоқда
Оҳангарон туманида йилига 912 минг тонна чиқиндини қайта ишлаш қувватига эга, қиймати 240 миллион долларлик заводнинг асосий биноси қурилиши якунланди.
Тошкент вилоятида чиқиндиларни электр энергиясига қайта ишлайдиган завод қурилмоқда
Тошкент вилоятининг Оҳангарон туманида маиший қаттиқ чиқиндиларни қайта ishlab, электр энергияси ҳосил қилувчи корхонанинг асосий корпуси қурилиши якунланди. Бундан ташқари, объектда инвестиция лойиҳасининг биринчи босқичи ниҳоясига етди.
Шу муносабат билан тантанали маросим «Янги Ҳаёт» маҳалласидаги корхона ҳудудида бўлиб ўтди. Унда Оҳангарон тумани ҳокими Баҳром Норқобилов, компания ва соҳавий ташкилотлар вакиллари иштирок этди.
Тадбирда сўзга чиққан туман раҳбари лойиҳанинг ҳудуд энергетикаси, иқтисодиёти ва экологик инфратузилмасини ривожлантиришдаги аҳамиятини таъкидлади. Маиший чиқиндиларни қайта ишлаш улардан энергия манбаи сифатида фойдаланиш, электр энергияси ишлаб чиқариш имкониятларини кенгайтириш ва атроф-муҳитга тушадиган оғирликни камайтириш имконини беради.
Корхона вакиллари қурилиш бориши, лойиҳа қуввати, қўлланилаётган технологиялар ва амалга оширишнинг кейинги босқичлари ҳақида сўзлаб беришди.
Лойиҳа Хитойнинг China CAMC Engineering компанияси иштирокида Ўзбекистон Президентининг 2025 йил 24 мартдаги ПҚ-116-сонли қарорига мувофиқ амалга оширилмоқда. Инвестицияларнинг умумий ҳажми 240 миллион долларни ташкил этади. Молиялаштириш тўғридан-тўғри хорижий инвестициялар ҳисобидан таъминланмоқда.
Корхонанинг лойиҳавий қуввати йилига 912 минг тонна маиший қаттиқ чиқиндиларни термик қайта ишлашни назарда тутади. Завод йилига 390 миллион кВт·соатгача электр энергияси ишлаб чиқариши кутилмоқда.
Кейинги босқичларда технологик ускуналарни ўрнатиш, монтаж ишлари ва ишлаб чиқариш тизимларини ишга туширишга тайёрлаш назарда тутилган.
Лойиҳа якунлангач, корхона ҳудуднинг чиқиндилар билан ишлаш ва муқобил энергетика инфратузилмаси таркибига кириши керак.
Шу билан бирга, қайта ишлаш ва электр энергияси ишлаб чиқаришнинг кўрсатилган ҳажмлари лойиҳавий кўрсаткичлар ҳисобланади.