Тошкент циркини реконструкция қилиш ва ривожлантиришга бизнес жалб этилади
Ўзбекистон давлат циркини реконструкция қилиш ва ривожлантиришга йирик тадбиркорларни жалб этиш режалаштирилмоқда. Савдо-саноат палатаси раҳбари ва унинг ҳузуридаги кенгаш аъзолари анчадан бери таъмирталаб бўлиб турган бинонинг ҳолатини кўздан кечирдилар. Циркни ривожлантириш режасини ишлаб чиқиш учун хорижий компаниялар жалб этилиши мумкин.
Тошкент циркини реконструкция қилиш ва ривожлантиришга бизнес жалб этилади
Тошкентдаги Ўзбекистон давлат циркини реконструкция қилиш ва ривожлантиришга йирик тадбиркорларни жалб этиш режалаштирилмоқда, дейилади хабарда.
Шу ҳафтада, таъмирланиши зарурлиги ҳақида кўп йиллардан бери гапириб келинаётган циркка ССП раиси Даврон Ваҳобов ва ССП ҳузуридаги жамоатчилик кенгаши аъзолари ташриф буюрди.
Цирк биноси 1965–1975 йилларда бунёд этилган. Жорий йилда у Тошкент модернизм намунаси сифатида ЮНЕСКО (Бирлашган Миллатлар Ташкилотининг Таълим, фан ва маданият масалалари бўйича ташкилоти) Бутунжаҳон мероси рўйхатига киритилган эди.
«Циркнинг ҳозирги ҳолати зудлик билан чоралар кўриш зарурлигини кўрсатмоқда… Мақсад — циркка янги ҳаёт бағишлаш. Бунинг учун Савдо-саноат палатаси ва тадбиркорлар циркни қайта тиклаш, модернизация қилиш ҳамда уни маданий ва туристик масканга айлантириш учун кучларни бирлаштирмоқда», — дейилади ССП хабарида.
Палата раҳбари ва жамоатчилик кенгаши аъзолари бино ва инфратузилманинг ҳолатини кўздан кечирдилар, шунингдек, замонавий талабларни инобатга олган ҳолда цирк фаолиятини ривожлантириш, тадбиркорлик субъектларини жалб этиш ва объектнинг туристик салоҳиятидан самарали фойдаланишни муҳокама қилдилар.
Ташриф буюрувчилар ва туристлар оқимини кўпайтириш мақсадида 2500 ўринли доимий кўргазма ва маданий-томоша майдончасини ташкил этиш ҳамда цирк атрофидаги ҳудудни ободонлаштириш бўйича таклифлар билдирилди.
Шунингдек, инфратузилмавий муаммоларни бартараф этиш чоралари ҳам кўриб чиқилди — замонавий вентиляция ва иситиш тизимларини ўрнатиш, шунингдек, том қисмининг ёғингарчиликдан ҳимоясини кучайтириш белгиланди.
Циркни ривожлантиришнинг комплекс техник-иқтисодий бизнес-режасини тайёрлаш учун Россия, Хитой ва Франциядан хорижий консалтинг компанияларини жалб этиш режалаштирилмоқда. Бинодаги барча ўзгаришлар Маданий мерос агентлиги билан келишилган ҳолда амалга оширилади, дейилади хабарда.
2 июнь куни президент Шавкат Мирзиёев «Маданият, санъат ва адабиёт соҳаларини янада ривожлантиришга доир кенг кўламли чора-тадбирлар тўғрисида»ги фармонни имзолади. Ҳужжатда, хусусан, цирк санъатини янги босқичга кўтариш кўзда тутилган ва цирк санъати ҳамда томоша тадбирлари ижодий бирлашмасини ташкил этиш маъқулланган.