Тошкент метросида носозлик юз берди, бузилган поезд йўналишдан олиб ташланди
Тошкент метросида носозлик юз берди, бузилган поезд йўналишдан олиб ташланди
Тошкент метрополитенининг "Шаҳристон" бекатида носозлик юз берди. 7 октябрь куни эрталаб поезд техник носозлик сабабли тўхтаб қолди.
"2026 йил 7 октябрь куни соат 08:22 да "Шаҳристон" метро бекатида 1985 йилда ишлаб чиқарилган эски ҳаракатланувчи таркибга тегишли бўлган 69-сонли поезд таркибида техник носозлик қайд этилди. Носозлик 6 дақиқа давом этди", – дейилади метрополитен хабарида.
Йўловчилар туширилди, поезд эса техник кўрикдан ўтказиш учун жўнатилди. Йўналишга захира таркиби чиқарилди. Метрополитен йўловчилардан келтирилган ноқулайликлар учун узр сўради.
Шунингдек, Тошкент метрополитени ҳаракатланувчи таркибини янгилаш доирасида 2026 йилда ўқув йили бошланишидан олдин пойтахтга 56 та вагондан иборат 14 та янги таркиб олиб келингани маълум қилинган.