Тошкент метрополитенида иш ҳақи кечиктирилгани ҳақидаги хабарларга изоҳ берилди
«Тошкент метрополитени» АЖ ижтимоий тармоқларда тозалаш ишлари билан шуғулланувчи ходимларга иш ҳақи кечиктирилаётгани ёки тўланмаётгани ҳақида тарқалаётган маълумотларни рад этди. Бу ҳақда корхона матбуот хизмати хабар берди.
Тошкент метрополитенида иш ҳақининг кечиктирилаётгани ҳақидаги хабарларга изоҳ берилиб, сидқидилдан ва тўлиқ ҳажмда барча ходимларга, шу жумладан фаррошларга иш ҳақи тўланиши маъмуриятнинг доимий назоратида экани билдирилди.
Хабарда қайд этилишича, сўнгги йилларда ходимларнинг ўртача ойлик иш ҳақи сезиларли даражада ошган. Агар 2021 йилда у 2,8 млн сўмни ташкил этган бўлса, ҳозирда 8,4 млн сўмга етди. Бундан ташқари, 2026 йил давомида у яна 20 фоизга оширилди.
Хусусан, фаррошларнинг ўртача иш ҳақи 2021 йилда қарийб 1 млн сўмни ташкил этган. Эндиликда, меҳнат стажи ва иш шароитларини ҳисобга олган ҳолда, ушбу тоифадаги ходимлар ўртача 6–7 млн сўм олишмоқда, дея аниқлик киритилди матбуот хизматида.
Шунингдек, ҳисобланган иш ҳақи мунтазам равишда ва тўлиқ ҳажмда белгиланган тартибда ҳар ойнинг бошида тўлаб берилиши таъкидланди. Маблағлар тўланмагани ёки ушлаб қолингани ҳақидаги баёнотларни компания ҳақиқатга тўғри келмайди деб атади.
Бундан ташқари, «Тошкент метрополитени»да ёлғон маълумотларни ҳамда ташкилотнинг ишчанлик обрўсига путур етказадиган ахборотни тарқатганлик учун қонунчиликда назарда тутилган жавобгарлик ҳақида эслатиб ўтилди. Компания ижтимоий тармоқ фойдаланувчилари ва саҳифалар администраторларини бу каби материалларни нашр этишда текширилган фактларга таянишга чақирди.
«Илгари сурилаётган таъкидларни тасдиқловчи асосли далиллар мавжуд бўлган тақдирда, жамият уларни очиқ мулоқот доирасида қабул қилишга тайёр», — дейилади хабарда.