Тошкент инфратузилмасини ривожлантиришга 4 млрд сумдан ортиқ маблағ йўналтирилади
Халқ депутатлари Тошкент шаҳар Кенгаши депутатлик округларидаги долзарб муаммоларни ҳал этиш учун 4 млрд 44,9 млн сўм (4 044 900,0 минг сўм) ажратиш тўғрисида қарор қабул қилди, бу VII-27-170-14-0-K/26-сонли ҳужжат матнидан келиб чиқади.
Тошкент инфратузилмасини ривожлантиришга 4 млрд сўмдан ортиқ маблағ йўналтирилади
Ҳужжатдан келиб чиқишича, маблағлар маҳаллий бюджетнинг 2026 йил 1 январ ҳолатига кўра шаклланган эркин қолдиқ маблағлари ҳисобидан ажратилади. Кузатув камераларини ўрнатишдан ташқари, барча йўналишлар бўйича маблағ олувчи сифатида Тошкент шаҳар ҳокимлиги ҳузуридаги Кўп квартирали уйларни таъмирлаш бўйича инжиниринг компанияси белгиланган.
Энг йирик алоҳида маблағ — 999,4 млн сўм — Учтепа тумани ҳокимлигига 20 та маҳалла фуқаролар йиғини ҳудудида кузатув камераларини ўрнатиш учун ажратилди. Қарор иловасида маҳаллалар рўйхати ва камералар сони аниқлаштирилмаган.
Иккита мактабгача таълим ташкилотини таъмирлаш учун жами 1 млрд 806 млн сўм кўзда тутилган. Ушбу суммадан 991 млн сўм Учтепа туманидаги 244-сонли боғчани таъмирлашга, шу жумладан иситиш тизими, том қисми ва йўлакларни асфальтлашга, 815 млн сўм эса Мирзо Улуғбек туманининг «Бўз» маҳалласидаги 418-сонли боғчани мукаммал таъмирлашга йўналтирилган.
Яна 560 млн сўм Юнусобод туманидаги «Халқобод» ва «Ўзбекистон Мустақиллиги» маҳаллаларидаги ички йўлларни таъмирлаш ва асфальтлашга сарфланади. Мактабгача ва мактаб таълими вазирлиги ҳузуридаги «Келажак» Республика маркази биносини таъмирлашга 363,6 млн сўм ажратилди. Миробод туманини ободонлаштириш, кўкаламзорлаштириш, суғориш ва яшил ҳудудларни ривожлантириш учун 315,9 млн сўм кўзда тутилган.
Қарорга кўра, Тошкент шаҳар Ғазначилик хизмати бош бошқармасига молиялаштиришни таъминлаш топширилган, маблағ олувчи ташкилотлар раҳбарлари эса маблағларнинг мақсадли сарфланишини кафолатлашлари шарт. Назорат Давлат молиявий назорати инспекциясининг шаҳар бошқармасига юклатилган.
Ҳужжат қабул қилинишидан олдин таклифлар 2026 йилнинг 15-25 сентябрь кунлари regulation.gov.uz порталида (ID-116721) 10 кунлик жамоатчилик муҳокамасидан ўтди. Ижро учун масъул этиб Тошкент шаҳар ҳокимининг биринчи ўринбосари Д. Худойбергенов тайинланди. Қарорда ишларни якунлаш муддатлари кўрсатилмаган.