Тошкент дорихоналарида дори-дармон нархлари бир неча баробар ошириб юборилгани аниқланди

Тошкент дорихоналарида дори-дармонлар нархи бир неча баробар ошириб сотилгани аниқланди

Тошкентдаги бир қатор дорихоналарда препаратлар белгиланган чекланган қийматлардан бир неча баробар юқори нархларда сотилган. Қонунбузарликлар Рақобат қўмитаси мутахассислари томонидан «сирли харидор» усулидаги текширувлар давомида аниқланди.

Хусусан, Shunqorlar дорихонасида «Полимик» препарати 12,8 минг сўм ўрнига 70 минг сўмдан, «Конвулекс» эса 66,4 минг сўмлик меъёр ўрнига 395 минг сўмдан сотилган. Muno Farm дорихонасида «Стимулотон» таблеткалари рухсат этилган 50,6 минг сўм ўрнига 295 минг сўм турган.

Amir Farm Trade дорихонасида «Бактамед» 18,8 минг сўм ўрнига 32 минг сўмдан таклиф қилинган бўлса, City Farm тармоғида худди шу препарат 63 минг сўмдан — 3,3 баробар қимматроқ сотилган. Hosil Farm дорихонасида «Лантус» 115 минг сўмлик меъёр ўрнига 190 минг сўм, «Слидерон» эса 115,6 минг сўм ўрнига 349 минг сўм — тахминан уч баробар қимматроқ турган.

Текширув якунларига кўра, қўмита кўрсатмалар берди ва лицензияларни қайта кўриб чиқиш учун материалларни ваколатли органларга юборди. Идорада текширувлар давом этиши, «сирли харидор» усули эса нархларни назорат қилишнинг мунтазам воситасига айланиши таъкидланди.

Бундан аввал нархларни ошириб юборганлик учун 2,5 мингдан ортиқ дорихона жазоланган, истеъмолчиларга 21 миллиард сўмдан ортиқ маблағ қайтарилган эди.