Тошкент аэропортида 8 та iPhone 18 ва 6 та iPhone 17 қурилмасини ноқонуний олиб киришга уринишди

Тошкент аэропортида 8 та iPhone 18 ва 6 та iPhone 17 телефонини ноқонуний олиб киришга уринишди

Тошкент аэропортида уч нафар йўловчи умумий қиймати 227 миллион сўмлик 14 та янги iPhone телефонини яширинча олиб киришга уринди. Телефонлар 20–22 сентябрь кунлари Дубайдан учиб келган йўловчиларда аниқланган.

Божхона хизмати хабарига кўра, мусодара қилинган қурилмалар орасида саккизта iPhone 18 ва олтита iPhone 17 бўлган. Йўловчилар ушбу телефонларни на оғзаки сўровда, на йўловчи божхона декларациясида кўрсатишган.

Амалдаги қоидаларга кўра, жисмоний шахслар шахсий фойдаланиш учун иккитадан кўп бўлмаган мобил қурилмани олиб киришлари мумкин. Телефонларни йўловчи божхона декларациясида кўрсатиш мажбурийдир.

Йил бошидан буён «Тошкент-АЭРО» божхона пости томонидан умумий қиймати 7,8 миллиард сўмлик 162 та мобил қурилманинг ноқонуний олиб кирилишига чек қўйилди.

Аниқланган ҳолатлар бўйича текширувлар давом этмоқда.