Тўлиқ сунъий интеллект бошқарувидаги Россия дрони Украинада 3 нафар тинч аҳолини ўлдирган – ОАВ
Нев Ёрк Тимес украиналик ҳарбий экспертлар ва криминалистларнинг хулосаларига таяниб ёзишича, ўтган ой Запорижжяга ҳужум қилган дрон тўлиқ автоном бўлган ва нишонларни ўзи танлаган. Рус дронларининг ичидан АҚШнинг Нвидиа компанияси чиқарган – АИ чипга эга мини-компютерлар топилган.
**Россиянинг тўлиқ сунъий интеллект бошқарувидаги дрони Украинада 3 нафар тинч аҳолини ўлдирди – ОАВ хабари**
Ўтган ойда Россиянинг экспериментал сунъий интеллект тизими томонидан тўлиқ бошқарилган дрони ҳужуми натижасида Украинада уч нафар тинч аҳоли вакили ҳалок бўлди. Бу воқеа 6-июл куни Запорижжядаги автомобилларга ёқилғи қуйиш шохобчасида содир бўлган. Ҳужум оқибатида 19 ёшли талаба қиз ҳамда 41 ва 48 ёшли икки эркак ҳаётдан кўз юмган.
Ушбу ҳодиса ҳақида маълумот тарқатган Нев Ёрк Тимес нашри украиналик дрон бўйича мутахассислар, ҳарбийлар ва криминалистларнинг хулосаларига таянади. Улар, шунингдек, Запорижжяга ҳужум қилган "Молния" туридаги Россиянинг бошқа дронлари қолдиқларини ҳам ўрганиб чиққан.
Таҳлилчилар ушбу дронлар тўлиқ автоном бўлган деб ҳисобламоқда ва бунга бир қанча сабабларни келтирган:
* Дронларда видеокамера мавжуд бўлса-да, оператор билан алоқа ўрнатиш учун антенналар бўлмаган.
* Портлаши одамларнинг ўлимига сабаб бўлган дрон тахминан олтита дрондан иборат гуруҳ таркибида учган.
* Учувчисиз қурилмаларнинг ҳеч бири ўз базасига радиосигналлар узатмаган.
* Бу дронлар Запорижжяга тўлқинма-тўлқин учирилган – битта оммавий ҳужум ортидан дарҳол бошқаси амалга оширилган.
* Энг асосийси, дронлар ичидан АҚШнинг Нвидиа компанияси томонидан ишлаб чиқарилган Жецон Орин мини-компютерлари топилган. Бу компания дунёдаги энг илғор сунъий интеллект чипларини ишлаб чиқаради.
Тахминларга кўра, айнан нархи атиги бир неча юз доллар бўлган чип ўрнатилган мини-компютерлар нишонни танлаш бўйича қарор қабул қилган. Нашрнинг ёзишича, аввалроқ бундай мини-компютерлар русларнинг бошқа қуролларидан ҳам топилганди.
Украиналик мулозимларнинг сўзларига кўра, Запорижжяга ҳужум қилган дрондаги Нвидиа мини-компютери шифрланмаган бўлган. Шу сабабли экспертлар модулга юкланган жой тасвирларини кўришган ва дроннинг дастурий кодини ҳам ўрганиб чиққан. Натижалар дрон қандай турдаги нишонларни таниш ҳамда уларга ҳужум қилишга ўргатилганини кўрсатган.
Тахминларга кўра, ушбу дронлар қуйидагича ҳаракатланади: оператор дронни маълум бир нишонга, масалан, ёқилғи қуйиш шохобчасига қараб учиш учун дастурлайди. Дрон унга яқинлашгач, обьектларни таниш бўйича олдиндан ўргатилган база асосида якуний нишонни, масалан, пропан баллонларини ўзи мустақил танлайди.