Тиранада намойишчи талабалар ҳукумат биноларига ҳужум қилишди
Албанияда минглаб талабалар университетларда яхшироқ шароитлар яратилишини ва иш ўринлари истиқболларини талаб қилмоқда, бироқ тартибсизликлар чоғида биноларга ўт қўйилган.
Тиранада талаба намойишчилари ҳукумат биноларига ҳужум қилди
Албания пойтахти Тиранада минглаб талабалар кўчаларга чиқиб, зўравонлик билан кечаётган ҳукуматга қарши намойишларнинг иккинчи кунида бир қанча ҳукумат биноларига ҳужум қилди.
Намойиш сешанба куни таълим вазирлиги биноси олдида бошланди, талабалар университетдаги шароитларни яхшилашни ва иш билан таъминланиш истиқболларини оширишни талаб қилишди.
Чоршанба куни таълим вазирлиги биносининг бир қисмига ўт қўпилди, шунингдек, бош вазир офиси, молия ва ички ишлар вазирликлари ҳамда яқиндаги бир қанча тадбиркорлик объектларига ҳужум қилинди.
Албания Бош вазири ўринбосари Албана Кочиу "босиқлик, вазминлик ва оқилликка" чақирди ҳамда "Албания ўзгариш учун ёниши шарт эмас" деди.
Газга қарши ниқоблар ва балаклавалар кийган ўнлаб намойишчилар таълим вазирлиги дарвозалари орқали тошлар ва пиротехника воситаларини отаётгани кўринди.
Тартибсизликларга қарши полиция намойишчиларни тарқатиш учун кўздан ёш оқизувчи газ ва сув пуркагичлардан фойдаланиб, улар билан тўқнашди.
Намойишчилардан бири Энида Бими Reuters ахборот агентлигига бу намойиш нафақат талабалар, балки "бутун Албания халқи учун" эканини айтди.
"Одамлар тизимдан жуда ғазабда. Улар ҳамма нарсани ўзгартиришлари керак. Атрофдаги шунча коррупция билан жиноятчилик ва бошқа ҳамма нарса содир бўлмоқда. Ва одамлар ҳозир ғазабда. Улар тизимни ўзгартиришлари керак", деди Бими.
Яна бир намойишчи Арбер Лешининг айтишича, одамлар "мамлакатимиз ҳеч қачон кўрмаган энг коррупциялашган ҳукуматдан" ғазабда.
Расмийлар баъзи намойишчиларнинг хатти-ҳаракатларини танқид қилишди.
"Муассасага ўт қўйиш тинч намойиш эмас. Бу одамлар ҳаётини хавф остига қўядиган ҳаракатдир", деди иқтисодиёт вазири Делина Ибраҳимай намойишчилар молия вазирлиги биносига тош отаётгани тасвирланган видеога муносабат билдириб.
Сешанба кунги намойиш пайтида "зўравонлик ҳаракатларига алоқадорлиги учун" ўн олти киши ҳибсга олинди, хабар берди Албания давлат ахборот агентлиги.
Талабалар томонидан бошланган ушбу намойиш Албания Бош вазири Эди Рамани истеъфога чиқишга чақираётган Фламинго инқилоби номи билан танилган бир неча ойлик ҳукуматга қарши намойишлардан сўнг юз бермоқда.
Намойишларга май ойида Трампнинг куёви Жаред Кушнер билан боғлиқ ҳашаматли туризм лойиҳаси сабаб бўлган эди, бу эса Рама ҳукуматининг коррупцияда айбланиши ва шаффофлик етишмаслигидан ғазабни оловлантирди.