Тиббий фавқулодда ҳолатлардан сўнг Шри-Ланка қирғоқлари яқинида 40 нафар эронлик денгизчи қутқариб олинди
Денгизчиларга Эронга учиб кетишдан олдин тиббий ёрдам кўрсатилди, деб хабар берди Шри-Ланка расмийлари.
Шри-Ланка қирғоқлари яқинида шошилинч тиббий ёрдамга муҳтож бўлган 40 нафар эронлик денгизчи қутқарилди
Шри-Ланка Ташқи ишлар вазирлиги оролнинг жануби-шарқий қирғоқлари яқинидаги халқаро сувларда аниқланмаган шошилинч тиббий ёрдамга муҳтож бўлган 40 нафар эронлик денгизчини даволаш ва ватанига қайтариш ишларини мувофиқлаштирганини маълум қилди.
Вазирлик матбуот котиби Тушара Родриго BBC Sinhala хизматига шанба куни Шри-Ланканинг Галле бандаргоҳига яқинлашаётган Эрон кемаларидан «шошилинч тиббий ёрдам зарурлиги ҳақида» офат сигнали олинганини айтди.
Унинг сўзларига кўра, қутқарув операцияси Эроннинг Коломбодаги элчихонаси томонидан ташкиллаштирилган.
Эрон кемалари АҚШ ҳарбий-денгиз блокадаси сабабли денгизда қолиб кетган. Шри-Ланка можарода холис позицияда эканини билдирмоқда, бироқ халқаро ҳуқуқ мажбуриятларини жўжлаб, баъзида эронлик денгизчиларга ёрдам кўрсатмоқда.
Ўтган ойда BBC Sinhala хабарида Шри-Ланка яқинидаги халқаро сувларда Эроннинг 21 та кемаси борлиги айтилган эди.
Родригонинг таъкидлашича, қутқарилган 40 нафар денгизчи турли кемаларда хизмат қилган, бироқ Шри-Ланка расмийлари уларнинг айнан нечта кемада бўлганини билмайди.
Унинг қўшимча қилишича, денгизчилар қирғоққа олиб чиқилган ва тиббий ёрдам кўрсатиш учун Коломбога етказилган, сўнг шанба оқшомида самолётда Эронга қайтарилган.
Операцияда бир нечта идоралар, жумладан, маҳаллий кемачилик компаниялари иштирок этди, деди у.
Родриго Шри-Ланка халқаро ҳуқуқ ва инсонпарварлик тамойилларига мувофиқ тиббий фавқулодда ҳолатларда зарур шароитларни таъминлаши шартлигини айтди.
«Бу биз ушбу кемаларга ёрдам кўрсатамиз дегани эмас», деди у. «Офат сигналини олгандан сўнг унга жавоб бериш умумий қабул қилинган халқаро анъанадир».
«Биз илгари ҳам шу каби ҳолатларга дуч келганмиз. Бу амалга оширилишда давом этаётган нормал жараёндир».
Эрон иштирокидаги можаро февраль ойида АҚШ ва Израиль ушбу мамлакатга кенг кўламли зарбалар берганида бошланган. Эрон бунга жавобан Израильга, Форс кўрфазидаги АҚШ базалари ва иттифоқчи давлатларга ҳужум қилди ҳамда муҳим халқаро савдо йўли бўлмиш Ҳормуз бўғизини амалда ёпиб қўйди.
Музокаралар боши берк кўчага кириб қолгани сабабли иккала томондан ҳам ҳужумлар давом этмоқда.
Шри-Ланка АҚШ ва Эроннинг ҳарбий транзит сўровларини рад этиб ҳамда иккала томонни мулоқотга эътибор қаратишга чақириб, можарода холис қолишга ҳаракат қилди.
У шунингдек, можарога тортилган Эрон кемаларига инсонпарварлик нуқтаи назаридан ёрдам таклиф этди.
Март ойида Шри-Ланка расмийлари АҚШ торпедо ҳужумидан сўнг унинг қирғоқлари яқинида чўкиб кетган Эроннинг Iris Dena кемасидан тушган офат сигналига жавоб берганликларини маълум қилишган эди.
Ҳужумда 80 дан ортиқ экипаж аъзоси ҳалок бўлган, жароҳатланган тирик қолганлар эса Галле бандаргоҳидаги шифохонага етказилган.
Кейинги куни Шри-Ланка расмийлари Эроннинг яна бир ҳарбий кемасига ўз портларидан бирига лангaр ташлашга рухсат берди, Президент Анура Кумара Диссанаяке «инсониятни ҳимоя қилишда ҳеч қачон иккиланмасликларини» айтди.
Шри-Ланка расмийлари шу ой бошида ўз қирғоқлари яқинидаги озиқ-овқат, сув ва ёқилғи танқислиги ҳақида хабар берган Эроннинг 19 та кемасига ёрдам юбориш бўйича тезкор режалари йўқлигини маълум қилди. Расмийлар миллий манфаатларни биринчи ўринга қўйишлари кераклигини айтган, деб хабар берди Associated Press.