Теннесси қамоқхонасидан қочган қотил бир ҳафталик қидирувдан сўнг қўлга олинди
Джейкоб Аллен Морли қамоқхона деворидан ошиб қочиб кетгунга қадар қотиллик учун умрбод қамоқ жазосини ўтаётган эди.
**Теннесси қамоқхонасидан қочган қотил бир ҳафталик қидирувдан сўнг қўлга олинди**
АҚШ расмийлари бир ҳафтадан кўпроқ вақт олдин Теннесси қамоқхонасидан қочиб кетган айбдор қотилни яна ҳибсга олди.
28 ёшли Жейкоб Аллен Морли Мемфисдан тахминан 90 миль (145 км) шимолда жойлашган Типтонвилл шаҳридаги Северо-Западний ахлоқ тузатиш мажмуасидан қочиб кетганида, 2022 йилда ҳамкасбини ўлдиргани учун умрбод қамоқ жазосини ўтаётган эди.
Теннесси ахлоқ тузатиш департаменти (TDOC) кузатув видеосида қамоқхона кийимидаги Морли 25 октябрь куни соат 23:30 ларда қамоқхона панжарасидан ўтиб кетгани, сўнгра яқин атрофдаги фермадан транспорт воситасини ўғирлагани акс этганини маълум қилди.
Чоршанба куни Теннесси қидирув бюроси (TBI) Морли маҳаллий, штат ва федерал идоралар иштирокидаги операциядан сўнг ҳибсда эканини айтди.
TBI ўз баёнотида терговчилар Морли Иллинойс штатидаги мулкда яширинаётгани ҳақида хабар олишганини, у ердан юк машинаси ҳам ўғирланганини билдирди.
Сўнгра юк машинаси Миссури орқали ҳаракатланаётганда, унинг давлат рақами рақамларни автоматик ўқиш технологияси ёрдамида кузатилган ва у ерга кузатиш учун маҳаллий ходимлар юборилган.
Морли Миссури штати патруль хизмати томонидан сешанба куни маҳаллий вақт билан соат 11:34 да Кэрролл округида «ҳеч қандай ҳодисасиз» ҳибсга олинди. TBIнинг маълум қилишича, транспорт воситасидан илгари ўғирлангани ҳақида хабар берилган учта ўқотар қурол ҳам топилган.
Қочганидан сўнг Морли TBIнинг энг кўп қидирилаётганлар рўйхатига киритилган ва TDOC уни ҳибсга олишга олиб келадиган маълумот учун 2 500 долларгача (£1 900) мукофот таклиф қилган эди. Чоршанба куни ушбу мукофот пули 15 000 долларга оширилди.
TBI тергов давомида жамоатчилик вакиллари маълумот берганини айтди, аммо мукофот пули тўлангани ёки тўланмаганини маълум қилмади.
Миссури штати патруль хизматининг билдиришича, қидирув операциясида Канзас-Сити полиция департаменти, Индепенденс полиция департаменти, ФҚБ, АҚШ Маршаллар хизмати ва Ички хавфсизлик тергов хизмати ходимлари иштирок этган.
Морли 2022 йилда ҳамкасби Коди Бёрчфилдни ўлдиргани учун биринчи даражали қотилликда айбдор деб топилган эди.
Морли 2022 йилда ҳамкасби Коди Бёрчфилднинг ўлими учун биринчи даражали қотилликда айбдор деб топилган. Унга 2025 йилнинг июнь ойида ҳукм ўқилган. Маҳкумнинг янги суд жараёни ўтказиш ҳақидаги илтимосномаси май ойида рад этилган.
BBC томонидан ўрганилган Картер округи суд ҳужжатларига кўра, Бёрчфилднинг жасади Морлининг уйи остидаги металл қутидан топилган.
Судда келтирилган патология ҳисоботида Бёрчфилд «бошининг орқа қисмига ўқ тегиши оқибатида» вафот этгани айтилади. Гильзалар Морлининг уйидан топилган қуролга мос келган.
Бёрчфилднинг синглиси судга берган жабрланувчи баёнотида, Бёрчфилд Морлини иккаласи ҳам ишлаган поддон ишлаб чиқариш компаниясида ўқитаётган вақтда улар дўстлашиб қолганини айтган.
Қотилликдан ташқари, Морли вандализм, далилларни сохталаштириш, оғирлаштирувчи ҳолатларда ўғрилик қилиш ва ҳибсдан бўйин товлашда ҳам айбдор деб топилган.
Бу Морлининг ҳуқуқ-тиртибот идораларидан биринчи марта қочиши эмас эди. Унинг 2022 йилдаги ҳибсга олиниши штат чегарасидан Шимолий Каролинага ўтиб кетган полиция қувиш операциясидан сўнг юз берган эди.