Дарахтга осилган ҳолда топилган қора танли аёлнинг ўлими бўйича ҳибсга олиш амалга оширилди
Тасиа Форчуннинг жасади август ойида Миссисипидаги ташландиқ уйнинг ҳовлисидан топилган.
Дарахтга осилган ҳолда топилган қора танли аёлнинг ўлими бўйича ҳибсга олиш амалга оширилди
Миссисипи полицияси дарахтга осилган ҳолда ўлик ҳолда топилган қора танли аёл иши бўйича илк ҳибсга олишни амалга оширди ва тез орада яна бошқа шахслар ҳам қамоққа олиниши мумкинлигини маълум қилди.
Тасия Форчуннинг жасади август ойида Жексондаги ташландиқ уйнинг ҳовлисидан топилган эди, бироқ полиция шу ҳафта бошига қадар унинг ўлимини эҳтимолий қотиллик сифатида баҳолаётганини эълон қилмаган эди.
«Бугунги ҳибсга олиш ушбу терговдаги муҳим қадамдир, аммо бу якун эмас», деди жума куни Жексон полицияси бошлиғи РаШолл Брэкни. «Ушбу иш бўйича фаол тергов давом этмоқда».
Форчуннинг ўлими ирқий зўравонлик ва линч қилиш тарихига эга бўлган штатдаги аҳолисининг аксарияти қора танлилардан иборат Жексон шаҳри аҳлини хавотирга солди.
Жума кунги матбуот анжуманида Брэкни тиббий эксперт Форчуннинг ўлимига қотиллик сабаб бўлганини тасдиқлаганини айтди ва гумонланувчи қотиллик айблови билан юзма-юз келишини қўшимча қилди.
Полиция бир кишини ҳибсга олган ва «терговчиларимиз далиллар изидан боришни давом эттирар экан, қўшимча ҳибсга олишлар кутилмоқда», деди у ва терговчилар ушбу иш бўйича 15 кишини сўроқ қилганини қўшимча қилди.
Форчуннинг онаси Кристи Спиви BBC’га полиция унга ҳибсга олиш ҳақидаги янгиликни етказиш учун қўнғироқ қилганида йиғлаб юборганини айтди: «Менимча, енгил тортгандай бўлдим... худди қалбимга бир оз хотиржамлик ингандек бўлди».
«Фақат улар тўғри одамни ушлашган деб умид қиламан», дея қўшимча қилди у.
Гумонланувчининг ҳибсга олиниши Спиви ва Жексон аҳолиси маҳаллий расмийлар томонидан нисбий сукут ва ҳаракатсизлик деб таърифлаган бир неча ҳафтадан сўнг юз берди.
Форчун ўлимининг даҳшатли тафсилотлари ва Миссисипининг ирқий линч қилиш тарихи билан бир қаторда, иш бўйича маълумотларнинг йўқлиги жамоатчиликни ҳайратда қолдирган ва қўрқувга солган эди.
Спиви бундан аввал BBC’га сўнгги икки ҳафта ичида Жексон полицияси билан бир неча бор боғланишга ҳаракат қилганини, кўплаб овозли хабарлар қолдирганини, аммо жавоб олмаганини айтган эди.
Брэкни жума куни оиланинг норозилигига тўхталиб: «Биз ушбу иш давомида она ва ўгай ота, шунингдек, биологик ота билан доимий алоқада бўлиб турдик», деди.
Спивининг чекланган мулоқот ва тергов суръати ҳақида расмийларга ёзган хати сешанба куни — Жексон полицияси эҳтимолий қотиллик ҳақида эълон қилган куни — шаҳарнинг оммавий йиғилишида ўқиб эшиттирилди.
«Мен ҳайратдаман», деди Спиви. «Бунга ишона олмаяпман. Бу жуда тез содир бўлди».
АҚШ Конгресси аъзоси Форчуннинг ўлимини «замонавий линч қилишнинг эҳтимолий» кўриниши сифатида баҳолади.
Шу ҳафта Конгресснинг 50 дан ортиқ аъзоси ФҚБ ва Адлия вазирлигига хат йўллаб, унда «кўплаб штатларда дарахтларга осилган ҳолда топилган қора танлилар ҳақидаги хабарлардан қаттиқ хавотирда эканликларини» билдиришди ва қора танли америкаликларнинг шубҳали ўлимлари бўйича мустақил тергов ўтказишга чақиришди.
Жорий йилда АҚШда қора танлиларнинг осиб ўлдирилиши билан боғлиқ камида 10 та ҳолат қайд этилган, дея таъкидлади улар ва 2000 йилдан 2025 йилгача бўлган даврда 70 дан ортиқ линч қилиш ҳолатлари ҳужжатлаштирилганини қўшимча қилишди.