Теҳрон Ҳўрмуз бўғозида кемалар учун жазо чораларини кучайтирмоқда
Эрон Ҳўрмуз бўғозидан ўтиш қоидаларини бузган кемаларга нисбатан жарима солиш, уларни ушлаб туриш ва ҳатто мусодара қилиш чораларини қўллаш мумкинлигини маълум қилди. Теҳрон қоидабузар деб ҳисоблаётган кемалар рўйхатини ҳам эълон қилган. Бу баёнот АҚШ Ҳўрмуз орқали нефт ташиш учун махфий денгиз йўлагини ташкил этгани ҳақидаги хабарлар фонида янгради.
Теҳрон Ҳормуз бўғозида кемаларга нисбатан жазо чораларини кучайтирмоқда.
Эрон Ҳормуз бўғозидан ўтиш қоидаларига риоя қилмаган кемаларга нисбатан чекловларни кучайтиришини эълон қилди.
23-август куни Эроннинг Форс кўрфази бўғозлари маъмурияти (ПГСА) ижтимоий тармоқда тарқатган баёнотида, қоидабузар кемалар кейинги сафар Ҳормуз бўғозидан ўтишда турли чекловларга дуч келиши мумкинлигини билдирди. Хусусан, бундай кемаларга жарима солиш, уларни ушлаб туриш ва айрим ҳолларда мусодара қилиш чоралари қўлланилиши мумкинлиги айтилган.
Эрон томони, шунингдек, Форс кўрфази акваториясига ёки ундан ташқарига юк ташиш билан шуғулланувчи компанияларни кемани ижарага олишдан олдин қоидабузарлар рўйхатини текширишга чақирди. Тегишли интернет саҳифасида Теҳрон Ҳормуз бўғозидан ўтиш талабларини бузган деб ҳисоблаётган кемалар рўйхати ҳам эълон қилинган.
Аввалроқ, 19-август куни Ахиос нашри АҚШ Қуролли кучлари Ҳормуз бўғози орқали кемалар ҳаракатини таъминлаш учун махфий денгиз йўналишини ташкил этгани ҳақида хабар берган эди. Нашр маълумотларига кўра, Уммон соҳиллари яқинидаги жанубий канал орқали ҳар кеча 15–20 та танкер ҳаракатланмоқда. Улар орқали жаҳон бозорига кунига қарийб 10 миллион баррел нефт етказиб берилаётгани айтилган. Бу урушдан олдин Ҳормуз бўғози орқали ташилган нефт ҳажмининг тахминан ярмига тенг.
Ахиос АҚШ президенти Доналд Трамп маъмурияти расмийларига таяниб, ушбу етказиб беришлар жаҳон нефт бозорига "сезиларли таъсир" кўрсатаётганини ёзган.
Бундан аввал АҚШ президенти Доналд Трамп Эронга қарши кенг кўламли иқтисодий босим бошланганини эълон қилган эди. У Теҳронни қўллаб-қувватлайдиган ёки Эрон билан бизнес алоқаларини давом эттирадиган ҳар қандай давлатга нисбатан катта миқдордаги санксиялар жорий қилиниши мумкинлигини айтган. Трамп, шунингдек, айни пайтда Вашингтон ва Теҳрон ўртасида музокаралар олиб борилмаётганини таъкидлаган.