«ТАСАННО» халқларни бирлаштиради

«ТАСАННО» халқларни бирлаштиради

Яқинда Тошкентда, Миллий маданий марказлар павильони ҳудудида «Тасанно» миллий таомлар ва маданиятлар халқаро фестивали бўлиб ўтди. Ўзбекистонда аккредитациядан ўтган Туркманистон, Фаластин, Индонезия, Ҳиндистон, Беларусь, Польша, Словакия, Озарбайжон, Жазоир, Покистон ва бошқа мамлакатларнинг дипломатик ваколатхоналари, шунингдек, барча миллий маданий марказлар, дўстлик жамиятлари ўзларининг ўзига хос хусусиятлари, гастрономик анъаналари ва қадриятларини намойиш этдилар.

«Тасанно» фестивали 2004 йилдан буён ўтказиб келинмоқда ва ўз фаолияти давомида турли халқлар ва элатлар вакилларининг миллий таомлари, санъати ва маданиятини бирлаштирувчи ноёб майдонга айланди. 24 йиллик тарихи давомида у халқлар ўртасидаги дўстлик ва ўзаро англашувни мустаҳкамлашга хизмат қилувчи халқ дипломатиясининг муҳим платформасига айланди.

– Фестивални ўтказиш ташаббуси 2004 йилда Халқаро алоқалар ва хорижий мамлакатлар билан дўстлик кенгаши томонидан илгари сурилган эди. Асосий ғоя гастрономия ва миллий маданият орқали турли мамлакатлар халқлари ўртасидаги муносабатлар ва дўстликни мустаҳкамлашдан иборат эди. Биз учун бу, аввало, халқ дипломатияси шаклидир, шунинг учун бу ерда қатъий чегаралар ва чекловлар йўқ. Биз дўстлик ва маданий алмашинув ғоялари яқин бўлган барчани бирлаштиришга интиламиз. Бугунги кунда «Тасанно» «Биродарлашган шаҳарлар альянси» ташаббуси билан ўтказилмоқда. Тадбирда элчихоналар, дўстлик жамиятлари ва миллий маданий марказлар иштирок этмоқда. Улар меҳмонларни ўз миллий таомлари ва маданияти билан таништирмоқдалар. Пазандачилик ва маданий анъаналар орқали одамлар бир-бирларини яхшироқ танийдилар, мулоқот қиладилар ва яқинлашадилар, – деди «Биродарлашган шаҳарлар альянси» ташкилоти раиси Зокир Обидов.

Ҳар бир павильонда таомлар тортилган дастурхонлар ёзилди, мусиқа янгради, миллий либослардаги миллий маданий марказлар вакиллари эса меҳмонларни кутиб олдилар. Фестивал давомида тақдим этилган таомлар ваколатли ҳакамлар ҳайъати томонидан турли номинациялар бўйича баҳоланди. Уларнинг ҳар бири фестивалда иштирок этаётган халқларнинг тарихи, қадриятлари, урф-одатлари, турмуш тарзи ва меҳмондўстлик анъаналарини акс эттирди.

– Уйғур ошхонаси бой ва хилма-хилдир. Энг сара таомлардан бири ўпкэ-ҳасип ҳисобланади – бу биргаликда тайёрланадиган ўпка ва ҳасипдан иборат таомдир. Ўпка сут, ёғ, туз ва тухум қўшиб тайёрланган хамирдан иборат махсус аралашма билан тўлдирилади ва ҳасип билан бирга тортилади. Бошқа анъанавий таомлар ҳам бор. Масалан, жутаза хамирдан қовоқ, сабзи ёки жўсай кўкати билан тайёрланади. Кўринишидан хонимни эслатади, лекин қиймаси билан фарқ қилади. Самбоза – сомсанинг бир тури: ичига гўштли қийма солинади, шундан сўнг маҳсулот ёғда қовурилади. Хоша қовоқдан манти принципи асосида тайёрланади, лекин пишганидан кейин ёғда қовурилади ва бироз тиндирилади. Умуман олганда, хамир ошхонамизда жуда муҳим ўрин тутади. Биз ундан кўплаб таомлар тайёрлаймиз. Анъанага кўра, уйғурларнинг кўплаб ошхона анжомлари ёғочдан ясалган: касканлар, хамир қориш учун идишлар, шунингдек, бошқа рўзғор буюмлари. Вақт ўтиши билан ёғоч буюмларнинг ўрнини кўп жиҳатдан металл буюмлар эгаллади, аммо анъана сақланиб қолди. Овқатланиш учун чука деб аталадиган махсус чўплардан ҳам фойдаланилади, – деди Ўзбекистон Уйғур миллий маданий маркази раисининг биринчи ўринбосари Гулнор Юсупова.

– Польша маданий маркази Ўзбекистонда Польша маданиятини намойиш этган ҳолда турли байрамларда фаол иштирок этишга ҳаракат қилади. Мамлакатимизда катта поляк диаспораси яшайди, шунинг учун анъаналаримизни асраб-авайлаш ва ёш авлодга етказиш биз учун муҳимдир. Мен маданият, миллий таомлар орқали бошқа халқни яхшироқ тушуниш мумкин деб ҳисоблайман. Бу ерда ҳамма нарса уйғунликда муҳим: таомлар, мусиқа, қўшиқлар, рақслар, мулоқот. Дастурхон атрофидаги суҳбат доимо одамларни бирлаштиради, бундай байрамлар эса турли миллат вакилларига бир-бирлари билан танишиш ва ўзларини Ўзбекистоннинг умумий маданий маконининг бир қисми сифатида ҳис қилиш имкониятини беради, – деди Ўзбекистон «Светлица Польска» поляк маданий маркази раисининг ўринбосари Юлия Шерахметова.

Нафақат мамлакатимизда истиқомат қилувчи халқлар ва миллатларнинг маданий марказлари, балки таклиф этилган иштирокчилар ҳам ўз урф-одатлари ва анъанавий таомларини тақдим этдилар. Тадбир доирасида фестивалнинг ташкил этилган пайтидан бошлаб то шу кунгача бўлган тарихига бағишланган фотокўргазма ҳам ташкил этилди.

«Тасанно»нинг асосий қисмида иштирокчи мамлакатларнинг миллий таомлари тақдимоти бўлиб ўтди. Миллий ошхоналарнинг ўзига хос хусусиятлари, таомларни тайёрлаш анъаналари, миллий дастурхон безатилиши ва тортиқ қилиш маданияти фестивал ҳакамлар ҳайъати аъзолари томонидан баҳоланди. Бу фестиваль томошабинларга турли халқларнинг гастрономик мероси билан яқиндан танишиш учун ноёб имконият тақдим этди.

Миллий таомлар билан бир қаторда, тадбир доирасида иштирокчи мамлакатлар вакилларининг мусиқий ва маданий чиқишлари намойиш этилди. Миллий куйлар, қўшиқ ва рақслар турли халқлар маданиятининг хилма-хиллигини кўрсатиб, фестивалга ўзгача файз бағишлади.