Танлинган ирландиялик музыкант Донал Лунни 79 ёшида вафот этди
У учта машҳур гуруҳ — The Bothy Band, Planxty ва Moving Hearts асосчиларидан бири бўлиб, Ирландия анъанавий мусиқасининг қайта тикланиши ва ривожланишига катта ҳисса қўшган шахс сифатида кенг эътироф этилган эди.
Машҳур ирландиялик музыкант Донал Лунни 79 ёшида вафот этди
Ирландиянинг энг машҳур анъанавий музыкантлари ва мультиинструменталистларидан бири Донал Лунни 79 ёшида вафот этди.
У учта тан олинган гуруҳ — The Bothy Band, Planxty ва Moving Hearts асосчиларидан бири бўлиб, Ирландия анъанавий мусиқасини қайта тиклаш ва кенгайтиришга қўшган ҳиссаси билан кенг эътироф этилган.
У, шунингдек, турли хил лойиҳалар, жумладан, теледрамалар, ҳужжатли фильмлар ва бадиий фильмлар учун мусиқа ва саундтреклар ёзган.
Сўнгги йилларда у Кейт Буш, Род Стюарт, Элвис Костелло ва Clannad каби замонавий санъаткорлар билан ҳамкорлик қилди.
У Ирландия мусиқа саҳнасида ўчмас из қолдиргани билан ёдда қолади ва бир пайтлар U2 гуруҳи аъзоси Боно томонидан оролнинг "Куинси Жонсга жавоби" деб таърифланган эди.
1947 йилда Оффали графлигининг Тулламор шаҳрида туғилган Лунни беш ёшида Килдэр графлигидаги Ньюбрижга кўчиб ўтди ва у мусиқа болалигидан бери ҳаётининг ҳамиша ёқимли қисми бўлганини айтган эди.
Ирландиянинг RTÉ телерадиокомпанияси хабарига кўра, у илк бор 1959 йилда ёш Кристи Мур билан учрашган ва бу икки мактабдош дўст кўп ўн йилликлар давомида сақланиб қоладиган мусиқий ришталарни кашф этган.
Мур, Лиам О'Флинн ва Енди Ирвин билан бирга Planxty гуруҳининг асосчиси сифатида Лунни анъанавий Ирландия мусиқасига янги шакл беришга ёрдам берди. Гуруҳ 1971 ва 1973 йиллар оралиғида учта альбом чиқарди, Лунни бутун жараён давомида бузуки, гитара, клавиатура ва бодран чалди.
1973 йилда у Mulligan Records лейблига асос солди ва кейинчалик 13 та альбом чиқарди, лейбл Boomtown Rats, The Radiators ва Агнес Бернелл каби санъаткорларнинг мусиқаларини нашр этди.
Лунни 1975 йилда The Bothy Band гуруҳига қўшилди ва Мэтт Моллой, Трионо Ни Домнайлл, Кевин Бёрк, Пэдди Глэкин ва Пэдди Кинан билан биргаликда анъанавий Ирландия мусиқаси чегараларини кенгайтиришга ёрдам берди.
Ирландия анъанавий мусиқа архиви Луннининг Ирландия мусиқасига кўрсатган таъсири "жуда катта" бўлганини айтди
1992 йилда Лунни олқишланган Bringing It All Back Home телесериалига продюсерлик қилди ва мусиқий директор бўлиб ишлади ва продюсер Филип Кинг билан узоқ йиллик ижодий ҳамкорликни бошлади.
У, шунингдек, Эйдан Квинн ва Жеймс Каан суратга тушган This Is My Father фильми учун ҳам саундтрек ёзган.
Ўнлаб йилларни қамраб олган муваффақиятли фаолиятидан сўнг, Лунни 2018 йилда BBC Radio 2 Folk Awards мукофотида умрбод эришган ютуқлари учун мукофот олди.
Ўтган йили унга RTÉ Radio 1 Irish Folk Awards мукофотида умрбод эришган ютуқлари учун мукофот топширилган эди.
Унинг охирги оммавий чиқишларидан бири август ойида Белфастда бўлиб ўтган Fleadh Cheoil na hÉireann [Умумирландия фестивали]даги ижроси бўлди.
Фаолияти давомида Лунни билан бирга ишлаган музыкант ва композитор Нил Мартин бу йўқотишни "жуда катта" деб таърифлади ва уни "фавқулодда шахс" эканини айтди.
"60-йилларнинг орталаридан бери анъанавий мусиқа дунёсидаги деярли барча муҳим ҳаракатларнинг марказида Донал турган эди", деди у BBC'нинг Evening Extra дастурига.
18 ой олдин Донал билан бирга ичимлик устида ўтирган вақтларини эслаб, Нил "Лунни яна қайтди" деб ўйлаганини айтди ва музыкант бир қанча вақтдан бери тоби қочиб юрган бўлса-да, унинг ўлими ҳақидаги хабар "бир оз шок" бўлганини қўшимча қилди.
У дастурга Донал билан сўнгги хотираси "бахтли" бўлганидан "хурсанд" эканини айтди.
"Ирландиядаги барча музыкантлар қайсидир босқичда унга таҳсин ўқиган бўлишади", дея қўшимча қилди у.
Ирландия анъанавий мусиқа архиви (ITMA) ўз баёнотида Луннининг Ирландия мусиқасига таъсири "жуда катта" бўлганини ва у "янги гармоник ва ритмик имкониятларни очганини" таъкидлади.
Унинг гуруҳларида яратган асарларига тўхталиб, улар "унинг тахайюли Ирландия мусиқаси янграшини шакллантирди" дейишди ва унинг фаолиятини "ижодкорлик, дўстлик ва ҳамкорлик" асосига қурилган деб таърифлашди.
"Донал ўзидан кейин фавқулодда бой ижодий мерос қолдирди. Унинг маҳорати, саховати ва таъсири тирик анъанага ҳамда уни таниган, ундан илҳомланган ёки у билан бирга чалиш ва ишлаш шарафига муяссар бўлган жуда кўп инсонларнинг ҳаётига чуқур сингган", деб қўшимча қилди ITMA.
Луннидан кейин унинг оиласи, жумладан, фарзандлари Ойсин, Кора Венера ва Сора Чан, шунингдек, унинг жуфти Уна О'Бойл қолди. Унинг акаси Манус ҳам машҳур музыкант ва продюсердир.
У 2000-йилларнинг бошларида ўзининг мусиқий ҳамкори Шинейд О'Коннор билан қисқа муддатли муносабатда бўлган ва 2004 йилда уларнинг Шейн исмли ўғли дунёга келган эди.
Шейн 2022 йилда 17 ёшида вафот этди, сўнг 2023 йилда унинг онаси ҳам ҳаётдан кўз юмди.