Тадбиркорларга иш ўринлари яратиш учун имтиёзли кредитлардан фойдаланиш имконияти кенгайтирилади
Оилавий ва ёшлар тадбиркорлигини қўллаб-қувватлашнинг янги механизми жорий этилмоқда: туман ва шаҳар штаблари маблағларни имтиёзли кредитлаш ва қарзлар бўйича фоизларнинг бир қисмини қоплашга йўналтириши мумкин бўлади. Ижтимоий реестрдаги оилаларни кооперация лойиҳаларига жалб қилган тадбиркорларга 5 млрд сўмгача гаровсиз кредит берилади.
Тадбиркорлар учун иш ўринлари яратишда имтиёзли кредитлардан фойдаланиш имкониятлари кенгайтирилади
Президентнинг 11.09.2026 йилдаги “Барқарор иш ўринларини яратиш ва кичик бизнесни жадал ривожлантириш орқали аҳоли даромадларини ошириш чора-тадбирлари тўғрисида”ги ПФ-193-сонли Фармони қабул қилинди.
Ҳужжатга кўра, барқарор иш ўринлари яратиш ва аҳоли даромадларини ошириш мақсадида ташкил этиладиган туман ва шаҳар штаблари оилавий ва ёшлар тадбиркорлиги дастурлари доирасида имтиёзли кредитларни тақсимлаш юзасидан қарорлар қабул қилади.
Штаблар 3,2 трлн сўмдан ортиқ молиявий ресурсларни тасарруф этиши мумкин бўлади, жумладан: оилавий тадбиркорлик дастурига ажратилган маблағлардан 1,37 трлн сўм, ёшлар бизнеси учун 450 млрд сўм, шунингдек, Камбағалликни қисқартириш жамғармасидан 240 млрд сўм ва Бандликка кўмаклашиш жамғармасидан 100 млрд сўм.
Штаб қарорига асосан, Ижтимоий реестрдаги оилаларни кооперация лойиҳаларига жалб қилган етакчи тадбиркорлар ҳар бир хонадонга 50 млн сўм миқдорида гаровсиз кредит олишлари мумкин бўлади. Бунда кредитнинг энг юқори миқдори 5 млрд сўмни ташкил этади.
1 октябрдан бошлаб штаблар ўзини ўзи банд қилган фуқаролар, кичик ва ўрта корхоналарга берилган банк кредитлари бўйича фоизларнинг бир қисмини компенсация қилиш ҳақида ҳам қарор қабул қилади. Субсидияларни тўлаш учун Тадбиркорликни ривожлантириш компанияси жавобгар бўлади.
Қарор қабул қилишда маҳаллий шароит, ривожланишнинг устувор йўналишлари ва лойиҳаларнинг самарадорлиги асосий мезон сифатида олинади. Кредит тарихи, барқарорлик рейтинги ёки корхона тоифасига қўшимча талаблар қўйиш тақиқланади.
Ижтимоий қўллаб-қувватлаш механизми ҳам ўзгаради — туман ва шаҳар штаблари ижтимоий ёрдам ва хизматлар кўрсатиладиган “Саховат ва кўмак”, “Аёллар дафтари” ва “Ёшлар дафтари” жамғармаларининг маблағларини (760 млрд сўм) тасарруф этиш имкониятига эга бўлади.
2027 йил 1 январдан бошлаб одамларнинг ижтимоий ёрдам ва хизматларга эҳтиёжи, шунингдек, Ижтимоий реестрга киритиш ҳақидаги қарорлар баҳолаш тизими асосида аниқланади. Молиявий ҳолатдан ташқари, оила аъзоларининг сурункали касалликлари, ногиронлик, меҳнат миграцияси, болалар сони ва бошқа омиллар ҳам ҳисобга олинади.
Оилаларнинг ижтимоий-иқтисодий ҳолати балл тизими орқали баҳоланади. Натижаларга кўра, оилаларга тегишли тоифалар берилади ва улар ижтимоий қўллаб-қувватлаш чоралари ҳамда хизматларидан фойдаланиш имкониятига эга бўладилар.
Шу билан бирга, Давлат ижтимоий суғурта жамғармаси меҳнат шартномалари бўйича банд бўлган аёлларга ҳомиладорлик ва туғиш таътили тугаганидан бошлаб бола бир ёшга тўлгунга қадар бола парвариши бўйича нафақа тўлашни бошлайди.
Ҳужжат билан қуйидагилар тасдиқланди:
Ҳужжат Қонун ҳужжатлари маълумотлари миллий базасида эълон қилинган ва 12.09.2026 йилдан кучга кирди.