«Таълимга энг кўп ишонган одамимни бежиз олиб келмадим». Президент — Турдимов ҳақида
Шавкат Мирзиёев ҳар бир университет ким учун ва қандай кадрлар тайёрлаётганини аниқ белгилаб олиши кераклигини айтди. Эркинжон Турдимовнинг Таълим ва фан вазири этиб тайинлангани ҳақида гапирганда, президент тўртта вилоятни бошқарган инсонни бежиз танламаганини таъкидлади.
«Таълимга энг кўп ишонган инсонимни бежиз олиб келганим йўқ». Президент — Турдимов ҳақида
Ўзбекистон президенти Шавкат Мирзиёев 12 октябрь куни Янги Тошкентдаги учрашувда Эркинжон Турдимовнинг янги Таълим ва фан вазирлиги раҳбари этиб тайинланганига изоҳ берди.
«Сони кўпайди, лекин сифати кам. Бундан буён ҳар бир университет ким учун ва қандай кадрлар тайёрлаётганини аниқ белгилаб олиши керак. Тўртта вилоятга ҳоким бўлган инсони Таълим вазирлигига бежизга олиб келганим йўқ», — деди давлат раҳбари.
«Газета» 9 октябрь куни Эркинжон Турдимов бош вазирнинг биринчи ўринбосари — таълим ва фан вазири этиб тайинлангани ҳақида хабар берган эди. Шу муносабат билан у 2025 йилнинг январь ойидан бери эгаллаб келаётган Сирдарё вилояти ҳокими лавозимидан озод этилди.
Илгари Турдимов Навоий вилоятини 2008—2016 йилларда, Сурхондарё вилоятини 2016 йил декабридан, Самарқанд вилоятини эса 2018 йил июлидан 2024 йил ноябрь охиригача бошқарган.
Таълим ва фан вазирлиги 3 октябрь куни Мактабгача ва мактаб таълими вазирлиги ҳамда Олий таълим, фан ва инновациялар вазирлигини бирлаштириш йўли билан ташкил этилган эди. Ислоҳот таълимнинг барча босқичлари ҳамда илмий фаолият ўртасидаги интеграция ва узвийликни таъминлашни, ягона бошқарув тизимини жорий этишни ва жамоатчилик олдидаги ҳисобдорликни оширишни назарда тутади.
Бош вазирнинг биринчи ўринбосари — таълим ва фан вазири таълим, фан ва соғлиқни сақлаш соҳаларидаги вазифаларнинг бажарилишини мувофиқлаштиради. Уларнинг ижросини назорат қилиш ва ташкил этиш Президент администрацияси раҳбари Саида Мирзиёевага юклатилди.