Судьялар мақоми тўғрисидаги қонун лойиҳаси такомиллаштирилди ва Сенатга юборилди
Судьялар мақоми тўғрисидаги қонун лойиҳаси такомиллаштирилиб, Сенатга юборилди
Олий Мажлис Қонунчилик палатаси «Судьяларнинг мақоми тўғрисида»ги қонун лойиҳасини такомиллаштиришни якунлади, уни маъқуллади ва Сенатга топширди. Ҳужжатда судьяларни тайинлашнинг янги тартиби назарда тутилган, шунингдек, уларнинг мустақиллиги, мақоми ва интизомий жавобгарлигига оид нормаларга аниқлик киритилган.
Асосий ўзгаришлардан бири ваколат муддати билан боғлиқ. Судьяларни биринчи марта беш йил муддатга, шундан кейин эса муддатсиз даврга тайинлаш таклиф этилмоқда.
Лойиҳани иккинчи ўқишга тайёрлаш жараёнида депутатлар судьялар фаолиятининг асосий принциплари тўғрисидаги нормаларни ҳам қайта кўриб чиқдилар. Хусусан, судья қарор қабул қилишда сиёсий қарашлардан ва ҳар қандай бошқа ташқи таъсирдан холи бўлиши кераклиги алоҳида мустаҳкамлаб қўйилди.
Қонунчилик учун янги бўлган истеъфодаги судья мақоми тўғрисидаги қоидаларга ҳам аниқлик киритилди. Бундай судьяларга гувоҳномалар бериш, уларнинг розилиги билан судьялар ҳамжамияти органлари ишида иштирок этишига ва профессионал медиаторлик фаолияти билан шуғулланишига рухсат бериш таклиф этилмоқда. Бундан ташқари, уларнинг судьялик даврида билдирган фикрлари ва одил судловни амалга ошириш билан боғлиқ қабул қилган қарорларига нисбатан дахлсизлик кафолатларини сақлаб қолиш режалаштирилган.
Шунингдек, интизомий жавобгарликка тортиш асослари аниқлаштирилди. Хусусан, «қонунийликни қўпол равишда бузиш» тушунчаси очиб берилди. Бундай фактни юқори турувчи суд тегишли хусусий ажримда акс эттирган ҳолда аниқлаши керак бўлади.
Такомиллаштирилгандан сўнг депутатлар қонун лойиҳасини қабул қилдилар ва уни Сенатга кўриб чиқиш учун юбордилар.
Шунингдек, Ўзбекистонда судьяликка ва халқ маслаҳатчилигига номзодларнинг энг кичик ёшини 35 ёшдан 30 ёшгача пасайтириш таклиф этилди.