Суд собиқ севгилисини қимматбаҳо совғалар қийматини тўлаш талаби билан судга берган эркакка қарши қарор чиқарди
Сингапур олий суди аёлнинг фойдасига қарор чиқарди, судьянинг таъкидлашича, эркак қайтариб олишга уринган 468 000 Сингапур доллари ($369 000) «ўз ихтиёри билан» сарфланган.
Сингапурлик эркак собиқ севгилиси билан муносабатда бўлган даврида унга сахийлик билан сарфлаган юз минглаб долларни қайтариб олиш бўйича суд курашида ютқазди.
Чандер Агарвал Фелиция Лидан қайтариб олишга уринган 468 000 Сингапур доллари ($369 000) унга «ўз ихтиёри билан» сарфлаган пуллар бўлган, деб қарор чиқарди Сингапур Олий суди.
Катта судья Ли Сэу Киннинг айтишича, Агарвал ҳатто улар жуфтликка айланишидан олдин ҳам «[Лини] қимматбаҳо совғалар билан сийлашнинг изчил намунасини кўрсатган» ва унга пулларни қайтаришни кутмаслигини айтиб ишонтирган.
Логистика компанияси бош директори бўлган Агарвал собиқ стюардесса Фелиция Ли билан 2019 йилда парвоз пайтида танишган. Судда уларнинг 2022 йил сентябридан 2023 йил декабригача ишқий муносабатда бўлганликлари маълум қилинди.
Агарвал Лини хиёнатда гумон қилганидан кейин уларнинг муносабатлари бузилган.
2024 йил март ойида даъво аризаси билан мурожаат қилган Агарвал Ли муносабатлари давомида ундан «турли фоизсиз қарзлар сўраганини» айтди.
Унинг даъво қилишича, бунга кредит карта харажатлари учун 206 000 Сингапур доллари, чет эл саёҳатлари учун 129 000 Сингапур доллари, унинг квартираси учун фэншуй устасини ёллашга 17 000 Сингапур доллари ва ҳаётни суғурта қилиш мукофотларини қоплаш учун 20 000 Сингапур доллари киради.
Ли эса бу тўловлар қарз эмас, балки «севги ва меҳр-муҳаббат туфайли берилган совғалар» эканини айтди.
Лининг томонини олган судья Агарвалнинг ишида ҳужжатли далиллар етишмаслигини айтди — масалан, у Ли сўраган деб айтилган қарзларни олганини тан олгани ҳақида далил тақдим эта олмаган.
«Менинг олдимдаги далиллар шуни яққол кўрсатиб турибдики, жавобгарга кўнгил қўйган даъвогар муносабатлари давомида уни қимматбаҳо совғалар билан сийлаган», деди судья.
«Афсуски, уларнинг муносабатлари ёмон нотада тугагач, [Агарвал] ғазабга минган ва ундан бунинг бадалини ундиришга қарор қилган».
Суд судьяси, шунингдек, Агарвал «қиммат дидга эга, шубҳасиз ўзига тўқ одам» бўлганини, Ли эса «бу тоифага кирмаганини» таъкидлади.
Кўплаб матнли хабарларда Ли «[Агарвал] қимматбаҳо совғаларни таклиф қилганда ҳайратини ва баъзида уларни қабул қилишга иккиланишини билдирган», деб қайд этди у.
Судья ўз ёзма ҳукмида инглиз драматурги Уильям Конгривнинг «Мотамзада келин» трагедик сатирасидаги ушбу сўзларидан иқтибос келтирди: «Осмонда нафратга айланган севгидек ғазаб йўқ, дўзахда эса рад этилган аёлдек қутуриш йўқ».
«Бу ҳолат бундай туйғу фақат бир жинсга хос эмаслигини кўрсатади», деди у.
2023 йил бошида яна бир сингапурлик эркак унинг ишқий таклифини рад этган аёлга қарши умумий қиймати 3 миллион Сингапур долларидан ортиқ бўлган иккита даъво аризаси билан мурожаат қилган эди.
К Кавшиган Нора Таннинг рад жавоби унга руҳий жароҳат етказганини ва обрўсига путур етказганини айтган.
Сингапур судлари унинг даъволарини рад этди. Кейинчалик Тан Кавшиганнинг таҳдидларидан ҳимояланиш пайтида қилган харажатларини ундириш учун унга қарши даъво аризаси киритди.