S&P Қозоғистон банк секторининг хавф-хатарлари баҳосини 6-гуруҳга кўтарди
С&P Қозоғистон банк секторининг хавф-хатарлари баҳосини 6-гуруҳга кўтарди
С&P Global Ratings Қозоғистон банк секторининг тармоқ хавф-хатарлари бўйича баҳосини 7-гуруҳдан 6-гуруҳга кўтарди ва мамлакатнинг иқтисодий хавф-хатарлари бўйича прогнозини «барқарор»дан «ижобий»га ўзгартирди, деб хабар берди Қозоғистон Молиявий бозорни тартибга солиш ва ривожлантириш агентлиги.
Агентликнинг билдиришича, S&P бу ҳақда 4 сентябрь куни Банк тизими мамлакат хавф-хатарлари баҳоси (BICRA) доирасида эълон қилган. Ушбу янгиланиш Қозоғистон банк сектори баҳосининг бундан аввал 2021, 2023 ва 2024 йиллардаги яхшиланишидан кейин юз берди.
С&P маълумотларига кўра, тармоқ хавф-хатарлари баҳосининг юқорилаши молиявий институтлар устидан назоратни кучайтириш бўйича кўрилган чораларни акс эттиради. Агентликнинг қайд этишича, Қозоғистоннинг назорат тизими янада бардошли бўлиб қолди ва иқтисодий стресс даврида молиявий барқарорликни сақлашга ёрдам берди. S&P, шунингдек, Қозоғистондаги банк соҳасини тартибга солиш ва назорат қилишни минтақадаги бир қанча бошқа мамлакатлар, жумладан, Ўзбекистон, Қирғизистон, Арманистон ва Озарбайжонга қараганда самаралироқ деб баҳолади.
С&P томонидан тилга олинган чора-тадбирлар қаторига банклар активлари сифатини мунтазам равишда текшириш, Назорат текшируви ва баҳолаш жараёнини (SREP) жорий этиш ҳамда ҳаддан ташқари таваккалчиликка нисбатан чекловларни кучайтириш киради. Агентлик чакана кредитлаш сегментининг жадал кенгайиши фонида ушбу соҳа устидан назоратни алоҳида таъкидлаб ўтди. S&P, шунингдек, кучайтирилган жорий назорат ва мониторинг, ҳисоботларнинг янада шаффофлиги, капитал ва ликвидликка қўйиладиган қатъий талаблар ҳамда мунтазам стресс-тестларни кўрсатиб ўтди. Назорат тизими корпоратив бошқарув ва юзага келаётган хавфларни, жумладан, кибербардошлик ва иқлим билан боғлиқ омилларни ҳам ўз ичига олади.
«Сўнгги йилларда банк сектори минтақадаги геосиёсий ва макроиқтисодий хавф-хатарларга нисбатан нисбий бардошлиликни намойиш этди. Молиявий тизимдаги умумий кредит хавфи назорат остида қолмоқда», — деди S&П.
Иқтисодий хавф-хатарлар прогнозининг «барқарор»дан «ижобий»га ўзгариши макроиқтисодий шароитлар барқарорлашиши, инфляция пасайиши ва активлар сифати кўрсаткичлари яхшиланиши билан Қозоғистон молиявий тизими учун хавф-хатарлар камайишда давом этиши кутилаётганини акс эттиради. BICRA қайта кўриб чиқилиши Қозоғистондаги бир нечта молиявий институтларнинг кредит профилларига ҳам таъсир кўрсатди. S&P «Банк ЦентрКредит»нинг узоқ муддатли рейтингини «BB+» даражасига кўтарди ва Freedom гуруҳи шўъба корхоналарининг миллий шкала бўйича рейтингларини «kzA» даражасига оширди.
Ҳозирда «BBB-» рейтингига эга бўлган Halyk Bank ва «B» рейтингига эга бўлган Nurbank узоқ муддатли рейтинглари бўйича прогнозлар «ижобий» қилиб ўзгартирилди. Freedom Holding халқаро рейтинглари бўйича прогноз ҳам «ижобий»га ўзгартирилди.