«South Park» яратувчилари Трампга шама қилиб, шоу номини «South America» деб ўзгартиришди
Иккинчи муддатини бошлаганидан бери АҚШ президенти кўл, қўлтиқ ва ҳатто АҚШ штатларидан бирини қайта номлаш учун «Америка» сўзидан фойдаланмоқчи эканини айтди.
«South Park» яратувчилари Трампга шаъма қилиб, шоу номини «South America» деб ўзгартиришди
Ушбу эълон «South Park» энг яхши анимацион дастур номинациясида «Эмми» мукофотини қўлга киритганидан кейин эълон қилинди
«South Park» анимацион телесериали яратувчилари янги мавсум «South America» (Жанубий Америка) деб номланишини маълум қилишди. Бу АҚШ Президенти Дональд Трампнинг кўл ва қўлтиқ номларини ўзгартиришга бўлган уринишларига ишора сифатида баҳоланмоқда.
«Apple ва Google компанияларининг жасорати ва ватанпарварлигидан илҳомланган ҳолда, биз «South Park» номини «SOUTH AMERICA»га ўзгартирмоқдамиз», — дейилади яратувчилар Мэтт Стоун ва Трей Паркернинг баёнотида.
Трамп август ойида Онтарио кўли номини Америка кўли (Lake America) деб ўзгартириш тўғрисидаги фармонни имзолаган эди, ўтган йили эса Мексика қўлтиғи Америка қўлтиғи (Gulf of America) деб аталиши кераклигини айтганди.
Ҳозирда 29-мавсуми намойиш этилаётган «South Park»нинг ушбу эълони якшанба куни шоу энг яхши анимацион дастур номинациясида «Эмми» мукофотини қўлга киритганидан кейин янгради.
Шоунинг расмий ижтимоий тармоқдаги саҳифасида жойлаштирилган расмий ном ўзгариши ҳақидаги постда «South Park» белгиси тасвирланган бўлиб, ундаги «Park» сўзи «America» сўзига алмаштирилган.
«Биз, айниқса, бош компаниямиз Paramount — Skydance таслим бўлишига миннатдорчилик билдирмоқчимиз», — дейишди шоу яратувчилари ўз постида.
Paramount Skydance — шоунинг бош компанияси ҳисобланади. Жорий йилда Трамп маъмурияти Warner Bros Discovery билан 111 миллиард долларлик (82,8 миллиард фунт стерлинг) бирлашишни маъқуллади — бу медиа тарихидаги энг йирик битимлардан биридир.
Бироқ, АҚШнинг 12 та штати ушбу келишув рақобатни камайтириши ва истеъмолчилар учун нархларни ошириши мумкинлигидан хавотирланиб, даъво аризаси киритганидан сўнг, бирлашиш жараёни 2027 йилнинг июнига қадар тўхтатиб қўйилди.
Шоу эълонидан бир кун олдин Трамп сунъий интеллект ёрдамида яратилган видеони жойлаштирган эди. Унда у «Нью-Мексикога хуш келибсиз» белгисидаги «Мексика» сўзи устига «Америка» сўзини ёпиштираётгани тасвирланган.
Август ойида АҚШ ва Канада ўртасидаги савдо кескинлиги кучайган пайтда, Трамп Онтарио кўли учун ҳам шунга ўхшаш ўзгаришни буюриб, уни Америка кўли деб қайта номлаган эди.
Кейинчалик Apple ва Google АҚШдаги фойдаланувчилар учун ўз харита иловаларида ушбу номни ўзгартиришди.
Ўтган йили эса Трамп Мексика қўлтиғини Америка қўлтиғи деб қайта номлашни буюрди. Мексика бу ўзгаришни қабул қилишдан бош тортиб, бир давлат халқаро сув ҳавзаси номини бир томонлама ўзгартира олмаслигини билдирди.
1997 йилдан бери эфирга узатиб келинаётган «South Park» АҚШ президентини унинг икки президентлик муддати давомида тез-тез масхара қилиб келган.
Стоун ва Паркер президентга қилган ҳужумлари сабабли Трамп, Оқ уй ва MAGA (Трамп тарафдорлари) томонидан бир неча бор танқидга учраган.
Шоунинг 27-мавсуми давомида, Трампнинг шайтон билан тўшакда яланғоч ётгани тасвирланган эпизоддан сўнг, Оқ уй «South Park»ни «эътибор қозонишга умидсиз уринишда илҳомсиз ғоялар билан аранг кун кўраётган тўртинчи даражали шоу» деб атаган эди.
Якшанба куни энг яхши анимацион дастур номинациясида мукофотни қўлга киритганидан сўнг, «South Park» саҳифасида Дональд Трампнинг ҳажвий тасвири туширилган ва «Ниҳоят «Эмми»нгни олдинг» деган ёзув бўлган сурат ҳам жойлаштирилди.
«South Park»нинг янги мавсуми премьераси 16 сентябрга белгиланган.