Соғлиқни сақлаш вазирлиги 14 миллиард сўмлик тендер бекор қилиниши сабабини маълум қилди
Соғлиқни сақлаш вазирлиги 14 миллиард сўмлик тендер бекор қилиниши сабабини маълум қилди
Соғлиқни сақлаш вазирлиги 14 миллиард сўмлик тўртта мультиспирал компьютер томографияси (МСКТ) аппаратини харид қилиш бўйича тендер иштирокчиларнинг техник таклифларини баҳолашдаги хатолик туфайли бекор қилинганини тушунтирди.
Идора хабарига кўра, иштирокчилардан бирига етарли асосларсиз сервис хизмати учун балл қўшиб берилган, шундан сўнг харид комиссияси тендер натижаларини бекор қилган.
Вазирликнинг аниқлик киритишича, тендер якунланганидан кейин «Skymed-Technologies» компаниясидан мурожаат келиб тушган. Харид комиссияси уни кўриб чиқиб, тиббиёт муассасаларининг эксперт гуруҳи иштирокчиларнинг техник таклифларини баҳолашда хатоликларга йўл қўйган деган хулосага келган.
Хусусан, ғолибга сервис хизмати кўрсатиш билан боғлиқ мезон бўйича асоссиз равишда қўшимча балл ҳисобланган. Шу сабабли, харид комиссияси 18 сентябрдаги қарори билан тендер натижаларини бекор қилган.
Аввалроқ Рақобатни ривожлантириш ва истеъмолчилар ҳуқуқларини ҳимоя қилиш қўмитаси тендерни ўрганиш давомида «Рақобат тўғрисида»ги қонуннинг 29-моддаси бузилганини аниқлагани ҳақида хабар берган эди, чунки унинг шартлари эркин рақобатни чеклаган ва айрим иштирокчилар учун устунликлар яратган.